Rij largo dilanti Aeropuerto a core for di USA Departures te na e parti di Arrivals

ORANJESTAD (AAN); Tin un sistema nobo na Aeropuerto di Aruba cu a wordo introduci algun siman pasa pa asina trata na mehora e fluho di pasaheronan cu riba Diasabra y Diadomingo tin di subi e tantisimo vuelonan cu ta sali for di e isla.

   Aunke a pone tent pafo, a pone borchi pa indica unda tur hende tin di para pa asina drenta e seccion di Aeropuerto pa nan aerolinea, toch e rijnan a keda y hasta a mira cu nan a bira mas largo.

   Diadomingo merdia mes, e rij cu tabata sali for di USA Departures a keda rek bay te na e terminal di Arrivals.

   Pasaheronan cu tin costumber di bin Aruba, ta haya cu ta hopi raro cu awor rijnan a bira asina largo.  Algun ta pensa cu ta e protocolnan pa yuda mitiga e brote di Coronavirus ta e causa.  Pero toch cu nan mesun wowo, nan ta mira cu esey no ta e caso y lo ta algo otro.

   Nan ta convenci cu e “tubo di fluho” di pasahero ta hopi smal ainda, y e cantidad di personal pa procesa y check-in mas pasahero pa minuut, por wordo drecha.  Aunke nan ta convenci cu lo por tin mas bottlenecks pa drecha.