Un bunita storia di amor...
Na aña 1955 dia cu mi tabatin 18 aña mi mayornan a wordo invita p'un fiesta di famia na Paradera y ami tabatin mag di bay cu nan. Un meneer a bin pidi mi pa baila y m'a acepta.
Pa mi n'e momento ey e meneer ey Ricardo Geerman a bira mi amor a primera bista. El a puntra mi pa mi nomber y unda mi ta biba. Prome cu e fiesta a caba yen di miedo m'a splik'e. El a cuminsa pasa cu su auto band'i cas.
Despues nos tabata topa ora sacrificio di misa caba y nos tabata combersa un rato prome cu mi bay cas, pasobra mi tata tabata hopi streng. Un dia m'a haya e curashi pa puntra mi tata si e tin mag di bin bishita mi na cas. Mi tata a zundra masha hopi mes, pero despues a acepta.
Ora Ricardo bin bishita mi, mi tata tambe tabata sinta cu nos. E cos di mas fastioso ta cu mi tata tabata pone un wekker ring pa asina Ricardo sa cu e tin cu bay cas. Ricardo tabata consumi, pasobra nos no por combersa nos dos so y Ricardo a bisa mi: Carmen si mi no por sinta cu bo, ni wanta bo man, ni duna bo un sunchi mi no ta bin bishita bo mas.
Asina nos a dicidi pa verloof y na luga di mi tata, un ruman tabata sinta cu nos. Asina nos a keda te cu nos a casa 28 februari, 1957. Di nos matrimonio a nace 5 yiu, 4 yiu muher y 1 yiu homber cual a fayece despues di algun dia.
Nos matrimonio no a bay facil door cu Ricardo tabata gusta sali cu amigo bay dal drinks y yega cas laat. Ami tabata keda cas cu mi yiunan haci mi trabounan di cas y dedica tempo cu hopi amor na mi yiunan. Den mi bida semper cu Dios na prome lugar mi tabata haci hopi oracion. Nunca m'a sigui conseho di hende cu tabata bisa mi pa divorcia y cu mi por haya un miho hende pa casa cu mi.
Mi mayornan a bisa mi b'a casa y b'a priminti Dios pa den bon y malo boso keda hunto y m'a cumpli cu mi promesa. Un dia 2 januari, hopi aña pasa n'e cas di Ricardo su ruman muhe el a lanta para. Dilanti tur hende presente el a hisa e botter di serbes cu e tabatin den su man den halto. N'e momento ey a priminti cu esey lo bay ta su ultimo serbes y cu e lo no bay bebe alcohol mas. Danki Dios, Ricardo a cumpli cu locual el a priminti. Si mi por a brasa Dios n'e momento ey lo m'a dune un brasa fuerte y un sunchi di agradecimento, pero no por y m'a gradici Dios cu tur e amor di mi curason den mi oracion. Di e dia ey nos matrimonio y tur cos den nos hogar a bay miho.
Di e dia ey nos a bira realmente un pareha. Nos tabata sali tur caminda hunto, sali bay baila, nos a drenta grupo di baile, hunto nos tabata bay train y duna presentacionnan na actividadnan di e celebracionnan cultural.
NOS A CUMINSA BIBA REALMENTE MANERA UN PAREHA Y CELEBRANDO BIDA HUNTO.
Fin di luna dia 28 di februari, 2022 nos lo celebra nos di 65 aña casa. Danki na Dios y e amor di mi pa Ricardo. Tambe hopi pasenshi y oracion.
