Riba Diadomingo Horcan Larry lo menaza Islanan Ariba cu olanan grandi

ORANJESTAD (AAN): Horcan Larry a sigui haya forza mey-mey di Oceano Atlantico riba Diabierna, y awor su bientonan ta menazando cu olanan hopi grandi tur e Islanan Ariba ora e yega hopi cerca riba Dialuna awor.

   E bientonan maximo sosteni di Horcan Larry tabata Diabierna merdia na 150 km/h, pues e ta uno di Categoria 1.  Su centro tabata na 14.8º Nort y 40.7º West, y esey tabata 2.400 km Oost-Zuidoost di St. Maarten.

   Larry ta moviendo West-Noordwest cu 26 km/h.  Segun National Hurricane Center, e lo sigui move asina e dianan venidero, y ta otro siman e lo bira mas pa Noordwest.

   Biento cu forza di Horcan ta extende te cu 45 km leu for di e centro, y biento cu forza di Tormenta Tropical ta extende 240 km leu for di e centro.

   Nan ta calcula cu Olanan halto y bruto lo cuminza azota e Islanan Ariba (incluyendo St. Maarten, Saba, y St. Eustatius) cuminzando Diadomingo.  E olanan aki lo por ocasiona condicionnan menazante pa bida den lama, y tambe crea coriente fuerte cu por saca un landado for di beach y mande leu den lama grandi.

   National Hurricane Center ta pronostica tambe cu Larry lo bay bira un Horcan mas grandi, esta di Categoria 3 of mas riba  escala di Saffir-Simpson.  Esey ta bientonan mas fuerte cu 178 km/h.

   E Horcan aki pa awor ta djis un menaza pa nabegacion, pues no tin ningun Hurricane Watch emiti pa ningun pais.  Simplemente e.o. barconan crusero cu ta den area di Islanan Ariba lo tin di tene cuenta cu lama lo ta bruto.