Riba Diabierna Aeropuerto di Aruba a keda casi henter dia cera

Pa di tercer vez cu e sistema nobo di Airco a faya

• Daño financiero pa AAA NV lo ta gigantesco 

ORANJESTAD (AAN): Un situacion dificil a presenta su mes desde Diabierna marduga caba, ora e tubo principal cu ta transporta liquido frieu for di e unidadnan gigantesco di e miyonario edificio di Utilidad di 80 meter pa 17 meter cu tin 6 sistema di Airconditioning Chillers (cu a wordo construi net patras di Departamento di Aviacion Civil na Sabana Berde), cual tubonan ta conecta cu e Terminal di Aeropuerto a kibra.

   E kibramento di e tubo aki a pone cu instantaneamente e sistemanan di airco na Aeropuerto a cuminsa saca aire cayente y no a fria mas.  Mainta trempan ora cu a ripara esaki, y cu a haya detaye di loke ta pasando, caminda cu paden a bira mes cayente cu forno, completamente insigur pa laga hende traha, y monton di pasahero paden.  Y pa colmo e dianan aki tin un calor inmenso riba e isla.

   Prome analisis:  Na prome instante a haya indicacion di tecniconan cu e tuberia aki por wordo drecha den 4 ora di tempo.  Asina a tuma e decision cu ta bay cera Aeropuerto pa tanto vuelonan cu ta yega, y vuelonan cu ta sali.  Djis debi cu no por laga hendenan den e parti paden.

   Como cu a tarda un poco pa anuncia e ciere di Aeropuerto, a resulta cu tabatin algun vuelo ya caba bulando rumbo pa Aruba.  Entre nan tabatin e vuelo di New York pa Aruba.  Na mitar caminda e pilotonan a ricibi e ‘Notam’ cu Aeropuerto di Aruba ta closed.  Esey a pone cu mitar caminda nan a pidi Trafico Aereo cu nan kier bay bek pa JFK Airport na New York.  E avion ey a bira bay bek, y henter atardi pasaheronan tabata den Terminal na Aeropuerto sperando cualkier noticia di Aruba.

   Otro vuelonan cu tabata den aire tambe caba, tabata demasiado cerca di Aruba, y capitannan a dicidi na bay ateriza na Aeropuerto di Curaçao sperando ki ora Aruba ta habri bek.

   Mientras tanto, Aeropuerto mes a manda un mensahe pa pasaheronan local, pa no bin Aeropuerto mes como cu ningun vuelo ta saliendo, y ta ofrece disculpa pa loke ta pasando.

   Trabao dificil: E analisis cu e tuberia lo wordo drecha rapido, a cambia pasobra a bin descubri cu e ta mas dificil y complica.  Pesey ya pa 10:40 am, Aeropuerto a bolbe duna update di e situacion, y bisando cu nan lo bay ta cera pa 3 ora mas, debi na e dolor di cabez cu e sistema di airco.

   Reaccion riba social media di parti di pasaheronan tabata fuerte y algun di nan furioso!  Esnan cu ta pega na Curaçao tabata keha di dje.  Varios di nan a keda sinta den avion na Curaçao su Aeropuerto.  Tambe esnan cu a keda stagna na New York.  “Absolutely ridiculous” tabata comentario di algun.

   Tabatin pregunta pakico Aruba no a implementa un plan di emergencia, pa pone algun tent pafo cu mesa, pa asina personal di Inmigracion y Aduana por atende pasaheronan.  Ta djis pone maletanan un parti pa e pasaheronan piki di nan, y asina sali pafo.  Tur esey sin cu mester drenta den Terminal.

   Ora cu 1’or a bati:  Pa 1:05 pm, Aeropuerto a duna otro update pa indica cu e fayo keto bay ta persisti, y cu pesey nan lo keda cera pa 6 ora mas ainda.  Pues e reparacion di par di ora, ya a bira mucho mas di loke a bisa na prome lugar. 

   Ultimo update: Pa 5:15, Aeropuerto a duna un update cu pa seguridad di tur pasahero, nan a dicidi di cera pa tur vuelo y lo keda cera te cu diasabra pa 7:00 am.

   Nan tabata pidi pasaheronan pa keda den contacto cu nan Aerolinea pa haya sa e status di nan vuelo.

   Esnan na Curaçao tambe a bira nervioso, pasobra e “maximo ora” cu e personal di cabina y piloto ta trahando, ta “time-out”, y nan lo no por pilotea avion mas si acaso Aeropuerto a habri bek 7:30 pm.

   E critica ta pisa riba e pober informacion cu Aeropuerto ta suministra.  Ta bisa cu e lo habri bek pa 7:30 pm, pero no ta informa si acaso US Customs tambe lo tey presente.  Esey ta pa esnan cu kizas ta pensa cu ainda nan por bandona Aruba anochi.

   Un solo airco: Tambe tabatin hende ta puntra con por depende riba un solo sistema di Airco pa henter e edificio?  Un solo tuberia ta kibra y Aruba su gate di Turismo ta bay plat.

   Den pasado por corda cu tabatin diferente unidad di airco ta fria cada seccion.  Si acaso sistema daña of sufri fayo, ta cierto sector so ta keda den calor.  Pero awor cu AAA NV a gasta miyones pa construi e edificio grandi di Water-Cooling Plant net pariba di Terminal di Aircargo, cu e meta pa nunca mas haya problema.  E edificio aki tin AC Chillers, y Cooling Towers.

   Sinembargo por corda con dia 18 di Januari di e aña aki mes nan a haya problema severo cu e airco den oranan di mainta.  Dia 26 di Februari tambe tabatin problema cu tubo di chiller a cuminsa lek.

   Y Diabierna marduga pa di tercer vez ta confronta problema serio, cu e biaha aki a laga Terminal di Aeropuerto full den calor.  A bin ripara pues cu e sistema no tin ‘redundancy’ cu sistema di back-up si acaso un seccion faya.

   Tampoco nada di back-up plan pa haci uso di parti pafo pa Douane y Inmigracion por procesa pasaheronan rapido, sin cu mester drenta Terminal pa e pasaheronan cu ta yegando.  Pa esaki tin di bay crea un “Plan-B” lo mas pronto posibel.

   Un gasto enorme: Ministro Dangui Oduber di Turismo a confirma riba social media, cu e crisis di Diabierna a trece “gastonan grandi” cune.  No por bisa exactamente cuanto e daño financiero ta, pero e ta un golpi fuerte pa Aruba Airport Authority NV.

   “AAA NV lo asumi e responsabilidad pa cubri e gastonan envolvi,” Ministro a declara.

   A ser mustra cu e edificio di Water-Cooling Plant costoso no tin problema.  E unidadnan di AC Chillers ta nobo ainda y funcionando bon.  Djis e tuberianan cu ta transporta e liquido frieu pa bay fria henter Aeropuerto a faya.  Tubonan por lek of kibra full, si acaso e presion interno di e liquido ta demasiado halto.  Semper tin un sistema di regulators cu pressure-relief valve cu por alivia esaki.

   Ministro Oduber a bisa cu e situacion ta uno fastioso, y hunto cu directiva lo bay garantiza cu esaki lo no socede mas den futuro.  E meta tabata pa Diabierna atardi a fix e sistema ainda pa asina toch por saca algun vuelo den oranan di anochi.

   Ministerio di Turismo tabatin contacto estrecho henter dia cu AAA NV, tambe cu Aruba Tourism Authority, y AHATA pa coordinacion di tur pasahero cu a wordo afecta.

   Full un dia di ‘landing geld’ perdi, un dia completo di benta di tur tienda y restaurant den Duty Free y tiendanan banda di gate.

   Riba e potret aki saca na Augustus 2019, por mira Ministro ta tirando un bista riba e sistemanan di seis airco grandi instala den e edificio di utilidad pa fria henter e edificio di Aeropuerto.

   Algun vuelo a baha: Segun dato di Aeropuerto, riba Diabierna mainta toch tabatin algun vuelo cu si a ateriza.  Dos vuelo di Dividivi, y dos vuelo di Z Air a ateriza prome cu 9:10 am.  Aunke a cera Aeropuerto e oranan ey, toch un vuelo di Avianca procedente di Medellin a logra baha 11:05 am.  Pa resto di dia, ningun vuelo mas a baha.

   E cinco vuelonan ey cu a logra baha mainta (incluyendo esun di Avianca), a logra lanta bek prome cu 9:41 am.  Esun Avianca pa Medellin a lanta te banda di 12:25 pm.  Despues di esey no tabatin aterizahe ni salida mas henter merdia ni atardi

   Te na ciere di edicion aki, un total di como 32 vuelo cu tabata programa pa bin Aruba, no a baha.