Riba Bierna Santo un Driekiel a subi beach cerca di Hadicurari

ORANJESTAD (AAN): Riba Diabierna Santo den oranan di anochi, testigonan a mira con un Driekiel grandi a subi beach den area di e toren mas panort di Holiday Inn Resort, net dilanti MooMba.

   El a lastra bay casi cerca di e edificionan, unda el a cuminza coba su neishi pa asina pone webo.  Mesora esnan cu a mira esaki a notifica tanto Central di Polis, como tambe e organizacion di Turtugaruba Foundation pa bin duna un man.

   Polisnan a yega y mesora a reconoce e importancia di e proceso di naturaleza aki, y nan a pidi tur hende eybanda pa nan mantene distancia y no stroba e tortuga grandi aki den su proceso.  Hopi hende cu tabata atende un fiesta na MooMba, tambe a cana bin mira esaki.

   A percura pa laga full un pida grandi di beach keda habri, pa asina e Driekiel por sigui haci su rituo di traha neishi y pone webo.  Tabata splica turistanan tambe cu esey ta un Leatherback Sea Turtle, cu ta regresa bek na e isla unda el a nace pa pone webo pa e siguiente generacion.

   Despues di a pone webo y a tapa e neishi, e Driekiel a regresa lama.  E voluntarionan di Turtugaruba hunto cu personal di DOW a pone e baricada, cu e borchinan normal, pa asina proteha e zona.

   Incubacion lo dura dos luna!  E potretnan aki pa cortesia di Turtugaruba Foundation.