Resultado di e bunita Bos di KiNiKi Festival 2021

ORANJESTAD (AAN): Den Cas di Cultura a tuma lugar riba Diadomingo, e final di mini-merengue Bos di Kiniki 2021.

   E atardi yena cu color- y talentonan infantil y hubenil a trece composicionnan nobo bailabel na Papiamento y a ser conduci pa Addonsito Croes y George Winterdaal.

   E cantante Rodrick “Rocco” Franken a ricibi cu basta emocion su trofeo ricibiendo e aplauso fuerte y largo cu su publico a brind’e.  Su palabranan tabata pa Aruba nunca stop di stimula nos chikitonan den e arte cu nan ta gusta! E cuerpo di hurado tabata Suriany de Mey, Joanna Maya, Rajiv Landaeta y Sandra van der Linden como presidente di hurado. Ganadonan a resulta:

   Pa Categoria A, e ganador ta Hailey Koolman cu e cantica “Pret’i wowo”.

   Pa Categoria B, e ganador ta Tizianne Kelly cu e cantica “Man de Man”.  Na di dos lugar tin John Paul Rapista cu e cantica “Kere den bo mes”.

   Pa Categoria C, e ganador ta Yetzenia Martines cu e cantica “Dios su Plan”.

   Fuera di esey tabatin premio special.  Premio di Mihor Trahe a bay pa Loany Ho Sing Loi.  Premio Amistad a bay pa  Esmee Flanegien.  Premio di Cantante Popular a bay pa Yetzenia Martines.

   E comision organizado consistiendo di Addonsito Croes, George Winterdaal, Dylan Fingal y Mieckey Gravenhorst ta gradici tur mayor, e publico presente, Prensa di Aruba, cada cas comercial, tur hurado, Cas di Cultura, cada artista invita y cada curazon chikito cu a participa. Pabien tur compositor y areglista cu a haci nos festival, exitoso. Masha danki tambe na tur patrocinador.