Contacto ta wordo busca cu familiares di Eduard Hubert Prince --- *Autoridad a entrega curpa sin bida na funeraria dos siman pasa --- *Ningun hende a reclama curpa di e difunto cu no por wordo dera
ORANJESTAD (AAN) — DIARIO a wordo acerca pa un situacion sumamente doloroso cu a desaroya na Curacao dia 28 di Februari 2022.
Gerencia di e Agencia Funeraria El Señorial a wordo acerca riba 28 di Februari 2022 dor di Polis pa bay busca restonan mortal di un persona, cu a muri un morto natural na Cherokezenweg 4 na Curacao.
Autoridad na e pais tin un areglo cu agencianan funeraria, cu nan ta encarga nan mes cu transportacion di personanan cu wordo descubri sin bida na nan cas.
E documentonan oficial di fayecimento a wordo entrega dor di Polis na e Agencia Funeraria El Señorial cu ta trata di establece contacto cu miembronan di famia di e difunto.
Segun a wordo splica na DIARIO e difunto Eduard Hubert Prince, a nace dia 14 di Januari 1942 na Aruba.
Pues ta trata aki di un Arubiano, cu aparentemente tabata biba so den su cas. E agencia funeraria no a ricibi ningun informacion mas despues cu dos dama, cu a presenta nan mes como bisiña a acudi na e agencia cu nunca mas a mira nan ni ricibi cualkier informacion adicional di e difunto.
Un situacion penoso a desaroya su mes despues cu ningun persona a presenta pa atende cu e difunto.
E agencia funeraria mes no por percura pa entiero di e difunto sin cu a ricibi orden di e famia of un persona cu tin e poder legal pa dicidi pa e difunto.
DIARIO a wordo acerca den e caso tristo cu segun DIARIO por a averigua no a wordo oficialmente anuncia den boletinnan di Polis na Curacao.
Despues di e bishita di e dos damanan, ningun hende mas a tuma contacto cu e agencia funeraria cu te awor no tin ningun indicacion si e difunto tabata tin mas famia of amigo na Curacao.
No ta conoci si familiares na Aruba, caminda el a nace, ta na haltura cu el a bandona e mundo aki.
E Gerente di e Agencia Funerario El Señorial di Curacao, Crisma Henriquez, a pidi DIARIO pa informa Pueblo di Aruba di e suceso y pa pidi cualkier persona cu ta miembro di famia of amistad di e difunto Eduard Hubert Prince, pa pone nan mes den contacto cu autoridad na Curacao of cu e agencia na telefon 005999-462-8888.
Segun a comprende un radio emisora na Curacao ya a duna su cooperacion trata na localisa personanan cu conoce e difunto, pero sin resultado.
Pa cualkier informacion adicional pues mester tuma contact directo cu e agencia funeraria na Curacao of cu Polis na Curacao.
