Cu un agenda hopi preta e simannan aki:
ORANJESTAD (AAN) — Minister di Enseñanza y Deporte señor Endy Croes, a duna di conoce den conferencia di prensa Dialuna, cu e siman aki e ta bay tin diferente reunion, entre otro, Diamars atardi lo atende cu SKOA-Werksters.
E mandatario a menciona cu e tin bunita noticia tocante Sint Aloysius Scol, cu prome e fin di luna aki e lo anuncia, tambe lo tin reunionnan planifica cu SIMAR, cu a pidi esaki net ora e mandatario tabata viahando. Ademas tin preparacion di presupuesto cu mester wordo trata prome cu e fin di luna di Maart aki.
E dignatario a agrega cu nan ta bezig cu proyectonan di data, cu ta conecta tur scol cu Departamento di Enseñanza; un proyecto grandi cu ta riba rails y cu nan ta pushando caba, ademas di un proyecto di restructuracion di DPS pa e por duna un miho servicio na scolnan. Fuera di esey, e ta bezig cu e tall beleid cu Diamars aki e prome reunion ta ranca y ta den e rapport tambe, y a wordo combersa na Hulanda, al respecto.
Ademas, e mandatario ta bezig pa lanta un comision pa aconseha gobierno encuanto un Instituto di Papiamento, y otro siman lo keda cla cu e comision cu lo haya 90 dia pa trece recomendacion con por atende cu esaki.
E ta pendiente pa e di tres of cuater siman di Maart pa reunionnan cu CBN (Canadian Bank Note) encuanto Lotto pa Deporte, unda ta bay bin reorganizacion, y esaki ta confirma atravez di dicho entidad.
