Region Atlantico den suspenso temporada horcan 2023

Dos tormenta tropical, un depresion y dos disturbio tropical

 *Alarma di horcan cu Franklin y peliger di calor pa hende

*DIARIO a anuncia explosion tropical den candela Atlantico 

ORANJESTAD (AAN) — E momento cu e lo a presenta, tabata dificil pa pronostica. Pero cu temporada 2023 lo skirbi si propio historia den Meteorologia mundial, tabata algo cu por a spera y por sigui spera.

Cu El Niño, e fenomeno di tempo den Oceano Pacifico cu ta genera bientonan cu ta stroba sistemanan tropical den Caribe, lo no por a percura pa un temporada 2023 calmo, tabata e pronostico mas importante di e aña aki.

Entrada di Augustus a haci hopi hende pensa, cu un estado di alerta lo no tabata necesario.

Dos tormenta tropical, un depresiony dos disturbio tropical den desaroyo pa haya mas forsa, ta e realidad cu a presenta su mes ayera y a marca historia.

Poco bez por mira con practicamente henter e region cu ta wordo considera como region Atlantico pa temporada di horcan, a wordo afecta pa sistemanan cu a desaroya.

DIARIO tabata continuamente den contacto cu informantenan na diferente paisnan pa tuma nota di nan condicion di tempo cu por a duna un indicacion pa Aruba, cu atrobe a registra pasashi di un sistema importante cu a desaroya rapidamente como Franklin, pasa pa Noord di e isla.

Sigur pa e islanan na entrada di Caribe, e situacion tabata uno di suspenso grandi debi na e forma cu e sistamanan tabata haya mas forsa y a cuminsa percura pa cambio den tempo.

DIARIO tabata den contacto sigur cu e islanan mas Noord den region y for di mainta tabata dispone di portretnan di e situacion na entre otro Sint Maarten cu for di Diadomingo mainta tabata uno di e islanan cu a haya hopi yobida manera e foto cu DIARIO ta presenta awe ta indica.

Franklin sigur tabata e tormenta tropical cu a causa mas impacto den e ultimo dianan, debi na e forma cu el a nace den region di Caribe pa Noord di Aruba pa forma un amenasa directo pa Republica Domincana.

Ayera 5 or di atardi, alarma a wordo bati pa Haiti y Republica Dominicana na momento cu Franklin tabata 435 km. Zuid West di San Juan Puerto Rico cu no tabata solamente den suspenso pa presencia di Franklin, manera e relato aki lo splica.

Franklin segun e pronostico di momento lo a sigui den e direccion West Noord West pa despues dal un buelta completo pa bay Noord y alcansa costa di Republica Dominicana.

Na e momento aki ya alarma a wordo bati na otro islanan den Caribe manera Sint Maarten, cu ya Diadomingo tabata den situacion di alarma pa e sistemanan tropical cu tabata den vecindario di e isla.

E condicion di yobidanan fuerte na Sint Maarten ta ilustra den e imagen cu ta parti di presentacion di e articulo aki.

Medidanan a wordo tuma pa embarcacionnan chikito mientras na tera mes tabata prepara pa posibel inundacion y peligernan di baranca cu por a bini abou.

Sint Maarten tabata den estado di alerta pa un area di presion abou cu tambe tabata tin un chens grandi pa desaroya.

Na mes momento e region mester a tene na consideracion tambe cu ainda Depresion number 6 tabata presente, aunke segun pronostico Dialuna e lo a disipa.

Mientrastanto tormenta tropical Emily, tambe a anuncia cu el a nace algun Miya for di Islanan Cabo Verde na momento cu costa di Golfo di Estados Unidos tabata prepara su mes pa otro disturbio cu tabata sigui aumenta den potencial mientras e tabata acerca e costa Mericano.

E situacion cu a presenta den fin di siman, ta causa instabilidad importante pa Aruba cu lo por spera yobida, strena y lamper.

Informacionnan di DIARIO ta indica cu hopi importante ta sigur e calor cu e sistemanan ta provoca pa medio di e forma cu nan ta afecta biento.

Manera ta conoci ora un pais of isla ta keda pa Zuid di sistemanan cu ta desaroya sigur mester tene cuenta cu e calor cu nan ta desaroya.

Informantenan a splica cu precaucion pa calor ta sumamente importante pa poblacion di Aruba den e dianan aki.

Falta di bon ventilacion den edificionan por afecta estado di salud di personanan cu ta sufri sigur manera di curazon of pulmon.

Pa biaheronan sigur ta importante pa sigui informacionnan di tempo den e temporada aki, cu manera tur advertencia a mustra y a keda proba, lo ta uno di hopi actividad  cu condicionan cu ta permiti desaroyo, manera na ciere di e edicion di awe ta wordo proba dilanti costa di continente Africano y den Golfo di Mexico, caminda e sistemanan tropical cu tabata presente, a sigui recobra forsa.