Lider di Plataforma Nos Pais:
*Refiriendo na esun cu el a instala na Parkietenbos
*E tabata traha 100 biaha miho cu di Hulanda
ORANJESTAD (AAN) – Otmar Oduber, Lider di Plataforma Nos Pais, den conferencia di prensa di Diaranzon, a expresa cu manera nan a bisa “No ta tarda mucho pa berdad sali dilanti” y sin drenta mucho den detaye riba e cartera di Minister Ursell Arends, pero cu e ta kere cu ta un cartera unda nada a wordo haci den tres aña y mey, ni den medio ambiente, ni un ley a wordo treci dilanti, apesar di tur esnan cu e si a laga atras den dos aña y mey cu el a asumi e cartera di medio ambiente y naturaleza.
“Nada a tuma lugar, desaster so riba tereno di transporte y e prueba ta cu a traha tres MB contra e taxistanan, cu na final di dia un MB ta contradeci otro cu a bay bek na e maneho cu ya caba tabata existi. Un payasada totalmente, y pa loke ta trata RWZI, Parkietenbos, desperdicio di sushi, awo mi ta kere cu e gobierno y e minister ta haya un bofta den nan cara. Ningun hende tin e rapport aki, ni un hende! No tin un miembro di Parlamento cu tine, por ta señor Ursell Arends tampoco tin e rapport ainda!” Otmar Oduber a señala.
El a subraya cu e rapport STAB ta uno diki, cu ta analiza y contesta tur pregunta cu tabata tin di Corte, den e caso aki, riba e discusion. Den linea grandi ta bisa cu e incinerator ta funciona fantasticamente bon, conforme tur normanan cu ta existi, internacionalmente, pa haci un trabao corecto y bon na Aruba.
“E rapport aki ta bisa cu no solamente e incinerator aki ta trahando corecto y bon na Aruba, pero hasta ta bisa cu e ta funcionando y cu e discusion cu tabata tin si e saca gasnan toxico, etc., a descarta y cu palabranan di expertonan a trece esaki pa Huez, na Corte, y ta bisa cu e ta traha cien biaha miho cu Hulanda mes, cu ta un pais cu t’asina cuidadoso riba su medio ambiente”, Oduber a subraya.
Den e rapport aki nan ta menciona hasta cu e sistemanan anterior, prome cu señor Otmar Oduber a forma parti di gobierno y a bin cu incinerator, ta totalmente afgekeurd. “E cuenta di kima den e container, cu por corda cu señor Arends kier a bay bek na dje, ora ami a denunci’e aki mes dilanti prensa, diripiente nan a trek’e e tempo ey. E rapport ta bisa cu nan no ta bay ni duna comentario riba e sistema cu nan tabata kima den container of den suela, na Parkietenbos, pasobra e ta un berguenza y un tristeza e forma con nan tabata hacie” Oduber a relata y señala cu esaki ta e cosnan cu mester papia aworaki!
