Mandel Jacopucci, PR
ORANJESTAD (AAN) — Fundacion Movimento ta Bida ta bezig cu nan programa di actividad pa cera aña 2024. Señora Mandel Jacopucci, Relacionista Publico di FMB ta relata.
Jacopucci a duna di conoce, den entrevista cu DIARIO, cu e Copa Jani Brokke ta yegando su momento culminante, unda cu Diabierna awo lo haci entrega di premio na e ganadornan di e diferente deportenan cu a tuma lugar.
Esaki ta e di 15 aña cu e evento aki ta tuma lugar pa 60 plussers brindando nuebe deporte. Por ehemplo, biyar, domino, volleyball, bowling, landamento, hiking, entre otro. Esaki ta un evento hopi popular, señora Jacopucci a señala.
“Ya caba despues di e siman aki, nos ta bendiendo carchi pa un evento anual, cu ta un song festival den combinacion cu un anochi bailabel. Esaki lo ta dia 17 di November venidero y nos tin carchi obtenible na Oficina di Fundacion Movimento ta Bida, na IBiSA”, Mandel Jacopucci a informa.
El a agrega cu lo tin animacion musical cu tres banda cu lo toca e anochi aki. Pa e parti di song festival tin 19 participante, cu na e momentonan aki ta training masha entusiasma. E ta pidi tur 60 plussers pa reserva of cumpra nan carchi di biaha.
E dama a agrega cu tin tres proyecto cu ta inicia den e ultimo cuartal di 2024, cualnan ta: Fisio-fit, Move cu Diabetes y Cana den Naturaleza.
“Pa e parti di Fisio-fit, por ta hopi hende no sa esaki, pero e ta tumando lugar na dies localidad, na ocho distrito di Aruba. Move cu Diabetes a cuminza siman pasa, y ainda tin espacio pa mas participante. E evento aki ta pa hende cu Diabetes tipo 2”, Jacopucci a duna di conoce.
Personanan interesa por registra. Ainda tin lugar pa como seis persona y e ta un bon proyecto. E tin bon resultado y tin guia profesional.(Tin un suma envolvi, pa participa).
