E anuncio di Ursell Arends cu Ministronan RAIZ no tin coordinador - *E relacion sano entre Gobierno y aparato publico mester bini dilanti - *Actitud cierto Companianan di Estado enfrente Gobierno a causa reserva
ORANJESTAD(AAN)—Awe Aruba ta yama bonbini na caranan nobo den e Conseho di Ministro. Na mes momento Aruba ta saluda un partido nobo como Miembro di Gobierno ehecutivo como resultado di nos sistema electaral.
Prome cu el a haci su entrada como Ministro, tabata Ursell Arends kende a capta nos atencion na un forma special, ora el a indica cu RAIZ lo no nombra persona como Coordinador di Ministerionan na su encargo, pero cu e partido lo traha directamente cu e aparato publico, e dirigentenan di e Ministerionan.
Pa DIARIO sigur ta trata di un asunto importante pasobra na varios occasion DIARIO a mustra, cu tanto Conseho di Ministro como Parlamento di Aruba tin e aparato gubernamental na su disposicion pa e por traha su trabou.
Pues awe, ora RAIZ asumi responsabilidad ehecutivo pa Aruba, su Ministronan ta pone un thesis di DIARIO na prueba y ta bay demostra cu ta posibel pa traha sin Coordinador pa Ministerionan.
Awe un epoca nobo ta cuminsa den cual no solamente e Ministronan pero tambe e aparato gubernamental mester duna prueba, cu por bolbe na e base caminda Ministronan ta ehecuta nan trabou, guia dor di un aparato gubernamental cu no solamente tin e capacidad pero tambe e boluntad pa haci su trabou sin mira e color politico den Gobierno.
Pa DIARIO decepcion grandi den posicion di loke mester sostene gobernacion di Aruba tabata, e forma cu sigur durante e ultimo temporada di gobernacion a bini dilanti, cu personanan cu ta wordo nombra a base di politica den maneho di un departamento, ta saca pia pa Ministronan di otro color politico cay.
Durante e gobernacion di Gabinete Wever-Croes, sigur durante ultimo tempo cu Aruba ta negocia un prijs di awa preferencial pa asina baha e gastonan di awa pa e Arubiano den tempo di crisis, por a mira con e aparato gubernamental of companianan di Gobierno, ta parce di ta obstaculisa trabou di Ministronan.
DIARIO ta tene na su principio cu na prome luga Departamentonan di Gobierno mester percura pa nan trabou haci funcionamento di e pais Aruba posibel, manera partido RAIZ ta trece dilanti.
Nos ta contento cu awor un oportunidad ta presenta pa test e posicion di DIARIO cu ta basa su mes riba e tempo, cu e aparato gubernamental y den esaki e departamentonan (ministerionan) cu a haya status di Compania di Gobierno, duna prueba cu den nan trabou nan no tin color politico.
Ta tristo ora mira con na na 2017, e parti di aparato gubernamental cu a traha directamente cu placa di pueblo pa gobierno Mike Eman, a laga un desastre atras como herencia pa Gobierno Wever-Croes cu no tabata di nan color politico.
Nos ta completamente di acuerdo cu nos proximo Ministro Ursell Arends cu maneho di e pais dor di Gobierno mester di sosten di e aparato publico, cu Pueblo ta paga pa haci su trabou. Pero e aparato publico mester sigui su codigo di honor y no por haci su mes sospechoso, di ta sirbi interes di un partido politico.
Aruba ta pasa den un situacion dificil y tur gasto cu por baha, hasta si e ta surpasa e norma cu Hulanda mes kier, nos mester baha cu cooperacion di gobernantenan pero tambe cu cooperacion di tur cu ta wordo paga pa sirbi Aruba y no color politico.
Ursell Arends a duna DIARIO un toren di observacion con e aparato gubernamental ta posiciona su mes enfrente e hecho, cu partido RAIZ ta debolbe na e base cu e aparato gubernamental ta sostene trabou di Gobierno y Parlamento.
Nos ta spera cu esaki lo ta un empuhe pa un mihor funcionamento di e aparato gubernamental cu ta wordo paga cu placa di Pueblo.
No mester lubida cu tin un diferencia entre e coordinador cu ta bay cu e Ministro cu baha mientras e sostenedornan ciego di partido, cu a haya un puesto den e aparato gubernamental por traha trampa pa un Ministro y asina pa un Ministro pa adelanto di nan partido den oposicion, aunke esaki nifica destruccion di Aruba.
Nos sosten na e posicion di Ursell Arends, cu mester resumi cu un thesis di DIARIO tabata basa riba berdad di funcionamento di e pais.
