Un di e hopi accionnan positivo cu merece aplauso di comunidad
*Momento pa dedica atencion na un placer cu ta enemigo di hende
*E efecto importante di sonido fuerte riba curpa y mente di hende
ORANJESTAD (AAN) — Ta wordo bisa cu hende a conoce pasonan gigantesco cu su descubrimentonan, cu a alarga bida di hende.
Berdad ta, cu hende a logra desaroya formanan pa atende cu enfermedadnan y problemanan cu presenta mientras edad ta subi.
No ta wordo bisa, sinembargo, cu si hende no a desaroya e loke por atende cu problemanan di salud, e cantidad di hende cu lo a muri den tempo moderno, lo ta mas halto cu e cantidad di hende cu a biba antes.
Hende, prome cu el adkeri mas y mas sabiduria, a kibra reglanan di naturalesa y a crea condicionnan cu ta afecta e bon funcionamento di e curpa y mente humano.
Den mayoria di caso, te na momento cu problema presenta, hende no ta realisa kico e ta haci cu su mes y con e ta crea problema pa su mes.
Den pasado, hende mester a drumi y traha na momento cu naturalesa tabata permiti esaki,
Condicionnan natural of provoca, tabata alerta hende pa peliger. Sea hende mester a drenta den accion dor di un explosion por ehempel, of e impacto di e explosion tabata stroba un bon descanso pa medio di soño.
Cantidad di condicionnan cu ta stroba hende den bida diario y ta di impacto grandi riba salud di hende, ta wordo ignora.
Hasta por yega na e conclusion, cu hende mester di sonido cada bez mas fuerte y constante, pa e sinti su mes bon.
Kico sonido ta haci cu hende?
Uno di e organisacionnan cu ta ocupa nan mes pa coregi problemanan cu hende mes ta crea y tin problema pa soluciona, ta Quota Club, cu den e ultimo dianan aki hunto cu Glenn Rock di WEB Aruba, a bishita schoolnan pa pone muchanan na haltura di e peliger cu sonido ta nifica pa nan salud.
Un accion cu merece aplauso, mescos cu accion di tanto boluntario na Aruba, cu ta sostene como boluntario e bienestar di e pais.
DIARIO awe ta reconoce esaki dor di cumpli cu su deber periodistico pa splica no solamente mucha pero tambe adulto, kico ta e peliger di sonido fuerte, cu den Carnaval sigur ta parti di e ambiente di fiesta.
Sonido fuerte tin efecto directo riba curpa y mente di hende, cu ta haya un shock, cu por wordo evita dor di accion y artefactonan pa evita cu e sonido ta afecta e sistema di oidi di hende y asina provoca problema serio.
Un sonido fuerte ta aumenta e cantidad di materia hormonal, manera adrenalina y cortisol den sanger di hende. Esaki ta visibel den e forma cu hende ta bira mas activo.
Resultado, sinembargo tambe por ta aumento di problemanan cu curason entre otro.
E horea humano ta wordo afecta y poco poco e capacidad pa scucha y tende sonido, ta bira menos.
Un persona cu ta continuamente somete na sonido duro, ta afecta su oido, pero tambe ta afecta su sistema nervioso.
Un sonido fuerte por keda resona den mente di un persona.
Den e temporada di Carnaval, Aruba ta prepara pa goza. Pa e gozo ta duradero, mester tuma precaucion.
Na mes momento, ban cuminsa aplica metodonan pa evita cu exceso di sonido, ta crea problemanan cu lo afecta nos calidad di bida.
Awe nos ta duna honor na e trabou di Quota Club, cu ta parti di tanto actividad cu lamentablemente no ta haya e oportunidad cu nan merece den publicidad, den nos intento pa pidi publico pa sostene e trabounan cu ta wordo haci pa bienestar di hende durante y despues di dianan di gozo.
