Puerto Rico escogi como base pa crusero di luho di e marca Ritz-Carlton

ORANJESTAD (AAN): E compania Ritz-Carlton ta bay haci nan viahe inaugural di nan tan spera marca di cruseronan di luho Ritz-Carlton Yacht Collection, saliendo for di San Juan (Puerto Rico), cu nan super-yate El Evrima, cu ta e prome di tres botonan cu e coleccion lo dispone di dje.

   E super-yate lo haci di Puerto Rico, nan home port den varios di nan itinerario di viahe pa region di Caribe y Centro y Zuid America, entrante Diaranson 10 di November.

   Entre lunanan di November 2021 te cu Februari 2022, nan ta spera cu nan lo usa seis ‘homeports’ na waf di San Juan.

   Den su prome itinerario, e pasaheronan lo subi e yate na San Juan, y lo bay bishita e islanan di Virgin Gorda, St. Maarten, St. Kitts, Guadaloupe, Martinique, St. Lucia.  Otro itinerarionan di e yate El Evrima ta inclui bishita na The Grenadines, Curacao, Aruba, Colombia, Panama, Barbados, y Tobago entre otro.

    E yate luhoso ta conta cu 149 suite cu balcon priva, 246 tripulante, y tin capacidad pa carga te cu 298 pasahero.  E amenidadnan exclusivo abordo ta inclui 9 restaurant cu menu inovativo cu ta refleha e tradicionnan culinario di e lugarnan cu nan lo bishita den e itinerario, spa, pool, gym, un boutique exclusivo, terraza y lounge cu bista espectacular di lama, y decoracion minimalista elegante.

   Durante lunanan cu a pasa, Gobierno di Puerto Rico a expresa nan satisfaccion cu Ritz-Carlton Yacht Collection a escoge San Juan como home port.   Nan lo ta bishitando e isla di Vieques y tambe ciudad di Ponce den e itinerarionan.  Puerto Rico ta haya esey un noticia excelente pa turismo.

   E super-yate luhoso a bira e prome barco crusero construi na Spaña, y e tin 190 meter di largura.  E yate lo haci algun viahe di test prome den Mediteraneo, prome cu e crusa oceano y yega Caribe.