Pueblo kier tene manifestacion grandi exigiendo husticia

Manifestacion lo ta Diadomingo tambe na Hulanda

• Internacionalmente caba ta papia di ‘Justice for Ayden’
• Hopi comentario publica di a ‘perde confiansa den KPA’ 

ORANJESTAD (AAN): Aunke tin un video cu audio unda bo ta tende claramente cu 18 biaha a los tiro den direccion di e hoben coriendo den e Toyota Vitz na Madiki Kavel, awor tin informacion nobo a sali cu e victima Ayden Lanoy a sufri solamente 1 tiro mortal na su curpa.  Un solo impacto di bala el a ricibi na altura di su cocodek.  Esey ta e bala cu a ocasiona su morto.

   Publico keto bay ta disgusta cu e forma cu a caba cu bida di e hoben aki, kende muy probablemente den su condicion, a bay den ‘panico’ ora cu diripiente Polis ta moviendo su tras.  Tin varios mayor cu tin yiu cu cierto condicion special, tambe ta sigur cu nan yiu tambe si acaso nan haya rijbewijs, ni maske cuanto rijles nan a ricibi, toch lo bay den panico ora di tende sirena y mira luz blauw cu cora nan tras.

   Riba Social Media ta sigui lesa informe cu ainda no tin hustificacion pa Polis “a sefta Ayden Lanoy” cu 18 bala, y bin bisa cu ta debi cu e no a stop pa patruya.”

   DIARIO a nota cu varios persona ta expresando nan opinion, bisando e.o. “No tin ningun hustificacion pakico a sigui persigui, siendo e auto tin tur cos na ordo y tin derecho di ta riba caminda.”

   “No tin ningun hustificacion pa bin bisa cu a asesina un hoben indefenso sin ningun arma pa por defende su mes.”

   Mientras tanto nan ta bisa cu tin di laga LandsRecherche y Ministerio Publico haci su investigacion.  Y kizas pueblo lo no haya e resultado tampoco, pasobra kizas lo keda cune scondi te ora cu e caso presenta den Sala di Corte di Husticia.

   Manifestacion na Aruba kizas Dialuna: Tabatin manifestacion planea pa e fin di siman aki den e protesta yama ‘Justice for Ayden’.  Esaki ta pa mustra e disgusto cu ta reina den pueblo, ora cu a bin haya sa cu loke Polis a trece dilanti den nan prome declaracion cu e hoben Ayden C’Jay Lanoy tabata coriendo su auto compacto Toyota Vitz cu luz paga, y despues ta aparece video unda ta mira cu luznan ta cendi normal.

   Loke a dal duro ta un Security Camera Video cu a bay viral riba social media, unda bo ta tende 18 tiro den apenas 5,3 seconde.

   Pueblo a cuminza expresa riba social media cu nan a perde confiansa den honestidad di Cuerpo Policial, y nan ta sinti cu tin di bay exigi ‘Husticia’ pa honor di Ayden y su famia.

   Na comienso tabatin planea pa tene e prome manifestacion den fin di siman aki, unda nan a traha hasta un emblema pa carga e protesta aki.  Tambe a imprimi varios sticker pa parti rond pa asina duna sosten na e exigencia di pueblo pa husticia wordo sirbi den e tiramento excesivo aki di agentenan policial riba un hoben di apenas 19 aña di edad.

   E hoben promotor local, MC Oz ta un di esnan cu ta buscando forma pa ofrece apoyo na famia di Ayden Lanor, pero na un sistema ordena y bao control tene e manifestacionnan aki.  Famia a informa MC Oz cu ainda nan no ta desea pa tene un manifestacion.  Nan ta ocupa prome cu e aspecto di despedida y entiero.  Despues lo sigui delibera riba e manifestacion.

   Pa colmo, un otro grupo a sali anuncia cu nan ta organizando un manifestacion yama pa Diadomingo awor for di Wilhelmina Park te dilanti Oficina di Parlamento.  El a bisa esesy debi cu esnan cu a core prepara e manifestacion ey, a haci esey sin cu e camisa a wordo bon botona.  Debi cu Diadomingo awor tin Carnaval di Oranjestad cu ta pasa ey dilanti.

   Segun MC Oz, mientras tanto diferente fundacion y comision ta uniendo na esun di nan, pasobra nan tambe ta comparti mesun pensamento cu loke a socede Diadomingo marduga na Madiki Kavel, ta parce di ta incorecto y pueblo no ta guli e pildo ey manda abao.

   Tur dos mayor di e victima Ayden ta inconsolabel e momentonan aki.  Nan ta imprimi sticker y ta spera cu ningun hende bay haci negoshi cu esaki.  E stickernan a wordo entrega Diabierna atardi durante entiero.  Djis nan kier pa e mensahe di ‘Justice for Ayden’ plama den tur skina di Aruba.  Pasobra segun e grupo, loke a pasa den fin di siman pasa, “no ta husticia”.

   Diabierna atardi a tuma lugar entiero di Ayden Lanoy na Ad Patres Funeral Home, y despues a sigui deramento na Santana Central di Sabana Basora.  Nan a pidi pa tur hende bay cu algo ‘blanco’ bisti.

   MC Oz a lamenta cu Ministro y Ministerio Publico a tene un conferencia di prensa, unda casi no a trece ningun informacion nobo pa calma publico.  Siendo cu publico ta sigui sinti cu ta ‘algo ta wordo tapa’.  E damage-control di Polis no ta yudando cu nada.

   Nan a bay entiero cu e ‘mind-set’ cu e despedida di Ayden lo bay ta uno pasivo.  Sin ningun trouble ni nada, y sin bonchincha.

   Pues en corto, segun MC Oz no tin ningun manifestacion planea pa awe Diasabra, y tampoco pa mañan Diadomingo.

   Sinembargo tin un grupo cu a indica cu nan lo tene un Manifestacion yama “Justice for Ayden C’J Lanoy” riba Dialuna 17 di Februari 2025 pa 10:30 am.  Pero ainda no a divulga e lugar.

   Manifestacion si na Hulanda: Aunke ainda famia na Aruba no ta desea pa e Manifestacion ‘Justice for Ayden’ tuma lugar, a sali na cla cu na Rotterdam (Hulanda) si tin uno planea e fin di siman aki.

   Na ciudad di Rotterdam, e ciudadano Hyram Rodriguez ta preparando un Manifestacion pa expresa cu yiunan di tera residencia na Tera Frieu tambe ta disgusta cu e forma cu a asesina e hoben Ayden C’Jay Lanoy, y con Polis a cuminza plama informacion completamente estilo “dis-information” na comunidad.  Danki Dios cu tin security video camera na casi tur caminda, pa asina pueblo a mira cu e auto tin luznan cendi, y cu en total 18 biaha a tira.

   E Manifestacion na Hulanda lo ta Diadomingo 16 di Februari 2025, pa 5:00 pm (17:00 uur) na Rotterdam Centraal.  Nan ta pidi tur Arubiano na Hulanda cu a keda disgusta con Polis a mata e hoben, y con Polis y Ministerio Publico kier laga pueblo den scuridad pa cu informacion concreto di e asunto.  Di Hulanda por manda informacion fuerte pa e.o. Gobierno Hulandes mes, pa nan mira con e derecho humano di e hoben aki a wordo viola na forma flagrante.

   Tata di Sayuri tambe na entiero: Un di e personanan cu Diabierna atardi tabata na entiero di Ayden Lanoy, tabata Mike Petronia, kende ta tata di e dama hoben Sayuri, kende na Juni 2021 a wordo tira mata den un caya na San Nicolas.

   Riba Social Media, e tata a indica cu el a presenta na e Funeraria pa mustra respet na Ayden kende a perde su bida debi na violencia di arma di candela.  Petronia a splica cu e mes ta completamente contra violencia di arma, y e tambe a menciona “No Justice, No Peace”.

   Mientras tanto a cuminza haci uso di e hashtag #justiceforAyden tambe.