Algemene Rekenkamer Aruba mester tene su mes na base legal --- *Ora Covid-19 a destrui economia e tanki di placa tabata bashi --- * Mester structura asistencia financiero y bini cu fondo di reserva
ORANJESTAD(AAN)- Un relato sumamente importante y historico a mira luz.
E instancia oficial Algemene Rekenkamer Aruba, cu mester vigila con placa di Pueblo ta wordo gasta, a emiti un relato den cual e ta atende cu FASE, e forma cu Gobierno a introduci durante pandemia pa duna asistencia na hende sin placa.
Cu e instancia oficial cu ta controla entrada y salida di placa di Aruba ta critica cu Gobierno a crea asistencia financiero pa un Pueblo na careda di e Coronavirus nobo, no ta parce normal.
Pero si tene na consideracion kico ley ta bisa, e ta normal y di acuerdo cu e tarea di Algemene Rekenkamer Aruba cu mester mira si placa di Aruba ta wordo gasta segun ley.
E controlador di placa di Aruba mes ta mustra riba e situacion special cu Covid-19 a crea y cu a haci cu Gobierno mester a percura pa tur hende por sigui come y biba.
Un circumstancia a presenta y a mustra cu den nos base pa gobernacion, leynan cu ta regla gobernacion, tin buraco importante.]
Tur empresa y hende cu traha un calculacion di placa cu ta wordo gasta, ta inclui reservanan pa situacionnan special.
Aruba no por haci esaki manera mester pasobra Aruba for di 2014 ta den estado di bancarota manera Hulanda mes a bisa.
Kico esaki ta nifica? Cu Aruba no tabata tin placa reserva pa asina por gasta na necesidadnan di Pueblo cu a presenta y cu mester a cubri.
Kico mester pasa awor?
E placa a wordo gasta y si no tin ley cu ta regla FASE mester traha ley. Mientras no tin ley, uso di placa cu no ta legalmente regla, ta contra ley.
Pues awor mester cuminsa traha riba e asunto aki pero tambe mester bini cu e exigencia cu den e cifranan di Aruba tin placa cu no por uza cu no ta den caso di un calamidad severo, manera Aruba a conoce.
Den un Estado di Derecho, un pais cu ta goberna segun y a base di ley, no por acepta nada cu no ta basa riba ley aunke e ta pan pa Pueblo come.
E motibo ta obvio. Si acepta un kiebra di e ley sagrado aki, e por wordo abusa y kico abuso por haci cu placa di Aruba ta mas cu bisto den e estado di bancarota cu a causa intervencion di Reino na 2014.
Pues awor mester crea reservanan y mester percura pa na cualkier momento cu un crisis surgi y mester crea fondo manera FASE, por haci esaki a base di un ley cu ta regla tur supervision necesario y ta percura pa e administacion debido manera entre otro Ley di Contabilidad ta exigi.
Mester a duna asistencia na Pueblo di Aruba ora a cera economia na un momento mundial historico. Awor mester remedia e parti legal, pasobra Aruba ta wordo goberna segun ley na interes di Aruba.
Ban regla e asunto aki den un situacion mundial sumamente dificil!
