Ni morto lider di AVP a respeta den su accion politico na Parlamento
*Presidente Conseho Electoral kier a informa Aruba riba aparatonan
*Proximo reunion di Parlamento lo trata scandal Refineria di Aruba
ORANJESTAD (AAN) — Kico a pasa ayera realmente dilanti edificio di Parlamento di Aruba ayera?
Esaki tabata e contesta cu DIARIO a bay busca ora un reunion informativo di parti di e Presidente di Conseho Electoral di Aruba, a bira ocasion pa Mike Eman a presenta cu un grupo di sostenedo pa protesta contra aparato electronico durante eleccion.
Durante ultimo simannan Mike Eman cu a logra keda for di Parlamento for di 2017, a trata di causa panico na Aruba cu informacionnan cu Gobierno di Aruba kier causa fraude na eleccion dor di uzo di aparatonan electronico.
Mike Eman no tabata ningun prueba cu e sistema di scanner cu Conseho Electoral di Aruba a introduci den cuadro di prevecion di Covid-19 na eleccion, tabata pa comete fraude.
Mester trece dilanti cu no ta gobierno di Aruba ta encarga cu eleccion pero Conseho Electoral di Aruba, cu ta mara na eleccionnan imparcial na Aruba.
Ayera Sr. Glenn Thode a bay Parlamento pa refuta informacionnan riba fraude. Pa Mike Eman, cu a nenga di drenta Parlamento na 2017 y a laga 8 Mil votado di Aruba pafo di su representacion den Parlamento, esaki tabata un ocasion pa bay crea loke e ta yama un protesta pafo di e edificio di Parlamento.
Pakico Mike Eman no a duna su fraccion oportunidad pa den Parlamento scucha sr. Glenn Thode prome cu el a presenta su show segun informantenan ta debi cu e show di Mike Eman tabata un forma pa kita tur atencion di Aruba for di dos caso den desaroyo.
Ta trata aki di e caso di tereno den cual ayera mas detencion a cay di personanan den e caso di tereno, cu a haci cu algun siman pasa ya Mike a fulmina contra Ministerio Publico cu ta conduci e investigacion.
Na mes momento Mike Eman ta trata na kita atencion for di otro bom cu ta rementa proximamente den Parlamento, cu lo reuni cu e comision cu a investiga Refineria di Aruba y a produci un rapport den cual nombernan di Richard Arends y Mike de Meza ta wordo menciona directamente hunto cu e director cu Gobierno Mike Eman a nombra pa Refineria di Aruba.
Informantenan a splica DIARIO cu lo no tarda pa un pagara rementa den Parlamento ora trata e rapport aki den cual sigur Mike Eman tambe mester defende su mes como Prome Ministro.
Reaccionnan cu DIARIO a ricibi ayera a rechasa e forma cu Mike Eman no a respeta ni victimanan fatal di Covid-19 ora ayera publicamente el a uza e reunion di Parlamento pa acusa Gobierno Wever-Croes di no atende Covid-19 cu diligencia loke asina a causa morto di e ciudadanonan Arubano cu a perde nan bida.
“Mike a uza morto pa hunga politica,” a wordo trece dilanti na DIARIO despues di otro accion di Mike Eman, cu na 2017 a nenga di tuma asiento den Parlamento y asina defende interes di Aruba den e sala di representacion di Aruba cu el a menosprecia.
Mientrastanto Glenn Thode den Parlamento a rechasa categoricamente e acusacionnan di Mike Eman, cu ta acusa realmente un organo cu mester ta riba politica di ta uza aparatonan cu ta habri porta pa fraude, cu ta un crimen.
Segun sr. Glenn Thode hustamente a mustra den e reunion, e tabata hustamente presente pa splica cu no tin motibo pa tin miedo cu por tin problema cu proximo eleccionnan.
DIARIO ta den contacto cu informantenan cu ta puntra nan mes kico lo pasa ora Parlamento reuni proximamente e rapport di Refineria, cu lo rementa bou pia di Gobierno Mike Eman manera un pagara!
