Parlamentario Misha Raymond, fraccion RAIZ:
ORANJESTAD (AAN) – Pasobra pueblo a pidi pe, Fraccion di Partido Raiz a yama su prome conferencia di prensa, Diahuebs mainta. Asina Parlamentario Misha Raymond, ken tabata hunto cu su colega Raymond Kamperveen, a menciona.
Misha Raymond a bisa cu nan a bin cu e conferencia di prensa aki pa trece varios tema dilanti, cu pa Fraccion di Raiz ta actual, pero tambe ta bon pa duna mas informacion con esakinan a bay.
Misha Raymond a señala cu, como confirmante di e ley pa cambia cierto aspectonan di e ley di Ombudsman, el a para den Parlamento y defende esaki. E ley a haya sosten, y esaki ta nifica cu pueblo por bay conta cu su ombudsman, dentro di poco.
Misha a agrega cu henter e proceso tambe a cuminza cana, entre otro esun pa solicita un ombudsman cu tin cu cana tur su proceso, pueblo por cuminza conta cune.
El a subraya cu loke e ta sumamente orguyoso cune ta cu e mes a añadi un parti den e ley, cu ta duna un tarea special na e kinderombudsman. Esey pa haci investigacion con hoben y muchanan ta wordo trata, si ta na un manera igual of no.
“Esaki ta algo cu mi ta sumamente orguyoso di dje pasobra ningun otro Ley di Ombudsman den e Reino tin esaki. Banda di esey, hendenan cu tin algun keho of preocupacion cu un compania di utilidad, manera WEB of ELMAR, tambe por acudi na ombudsman”, Misha Raymond a splica.
El a bisa tambe cu tabata tin hopi conmocion pa loke ta e retiro di ombudsman, y cu a trata e ley aki aña pasa pa purba di ancr'e den e Constitucion, pero esaki no a haya sosten, pasobra tin diferencia di opinion politico.
“Y semper mi a bisa cu aunke tin un diferencia di opinion politico ainda nos tin un deber, y e deber aki ta duna pueblo su defensor di pueblo, y esaki ta loke a tuma lugar. Pues, ami ta anhela tambe pa wak con lihe e proceso ta cana, pa pueblo por cuminza bay na su defensor”, Misha a expresa.
