Presidente actual di KvK Gavril Mansur:
ORANJESTAD (AAN) – Segun Gavril Mansur, Presidente actual di Camara di Comercio y Industria di Aruba, e cambionan di impuesto cu ta tumando lugar den nos pais, y esnan cu ta na caminda cu a cuminza 1 di Januari y mas ta bin pa 1 di Juni of Juli, no ta e manera mas eficiente con nos ta bay na Aruba.
“Parce cu nos ta introduciendo cambionan prome cu nos sa tur e efectonan cu esaki ta bay trece cu ne. Esey ta keda un di nos retonan, con nos ta yega na mas claridad. Tin hopi pregunta ainda di e cambionan cu ta na caminda, pasobra tin hende ta kere cu ta solamente e aumento di 1% riba BBO, pero no ta esey. Tin otro cambio chikito den e ley cu a bin cune, y hasta e concepto di e ley aki tabata conoci prome cu el a pasa, no mucho tempo pero e tabata conoci ora a haci un bon trabao y duna sesionnan di informacion. Pero toch apesar di esey, na ultimo bo por ripara cu tin cambionan cu ningun hende a discuti. E verlenging regeling aki.
Mi no sa cuanto hende eyfo, cuanto comerciante ta conciente cu esaki por tin consecuencianan grandi” Presidente di KvK a remarca.
El a agrega cu e companianan aki na Aruba mester bay paga un BBO riba servicionan cu nan ta haya di companianan den exterior. Como un ehemplo, el a menciona Netflix, si un banco ta use pa algo, pa cual cu sea cu nan ta haci tin cu bay paga belasting riba e placa cu e ta paga Netflix, pasobra e ta un servicio electronico y e proveedor di e servicio ta den exterior.
“Pero ainda no tin claridad cien porciento kico si, kico no. Tin di nan ta facil, Netflix ta uno. E ta den e pakete cu bo tin cu bay paga, pero tin hopi cos cu no ta sigur. E companianan, aworaki, tin cu bay pasando den e tramite pa evalua cuanto proveedor nan tin, si nan ta cay den e ley aki of no, kiermen tin hopi incertidumbre ainda, y si mi no ta hera e prome aangiften ta 15 di Februari; kiermen, nos ta introduci algo y parce cu eigenlijk nos no ta cla pe. Esey mi ta kere cu ta un di e retonan cu nos tin cu nos tin cu pensa riba dje y evalua di con e cosnan aki ta pasa”, Gavril Mansur a remarca.
