ORANJESTAD (AAN) – Parlamentario Marco Berlis a hiba palabra den e conferencia di prensa di fraccion di Partido Movimento Electoral di Pueblo MEP,
y el a enfoca riba e Ley di Screening, cual reunion publico lo bin pronto. Manera ta conoci den pueblo di Aruba esaki ta e Landsverordening Integriteit Ministers.
“Na 1997, Aruba tabata e prome nacion di Caribe Hulandes cu a bin cu e iniciativa pa bin cu un ley di screening pa Ministernan. Aña pasa riba October 5, a trata e ley aki un biaha mas, y esaki no a logra di worde aproba. Esaki ta algo hopi lamentable, pasobra e ta asina importante pa nos tin un ley asina aki. Mientras tanto cu nos a trata di aproba e ley aki, na Curaçao, na aña 2012 nan a aproba un ley asina y tambe na Sint Maarten na 2014, esaki a pasa”, parlamentario Berlis a señala.
El a sigui splica cu despues cu Raad van Advies a duna su conseho riba e ley aki, den e ultimo proposicion, esaki a keda adopta den dje, cual ta hacie un miho version di e ley aki cu a yega di existi.
“Aruba mester di e ley aki, y nos mester cuminza tuma pasonan firme pa pone den e lugar leynan cu ta bay trece mas transparencia y tambe seriedad den gobernacion. Nos di fraccion di MEP ta decidido di vota pa un ley, cu lo cuminza bira un ehemplo di e cuminzamento di un nivel di transparencia cu pueblo kier wak den diferente area di gobernacion, negociacion y liderazgo. E trabao no ta caba akinan sino cu e ta, apenas, cuminzando den locual tin di haber cu integridad, pasobra nos ta stima nos pais”, Berlis a señala y a agrega cu pronto e reunion publico di Staten pa e Ley di Screening lo tuma lugar y pueblo lo por huzga pa su mes, kendenan ta vota pro y kendenan lo ta contra integridad.
