Abogado mr. Illes ta splica - ORANJESTAD (AAN): Ainda no tin un decision si Paul Croes ta apela e sentencia di Hof di Corte Superior.
Asina e abogado mr. Illes a duna di conoce na DIARIO. E abogado a splica cu a base di ley, tin un periodo di 2 siman pa por apela e sentencia.
EVALUA SENTENCIA DI HOF
Mr. Illes a duna di conoce cu e intension ta cu e siman aki ainda nan lo bay reuni pa evalua e sentencia di Paul Croes y Melony Croes-Paesch den tur tranquilidad y mira si lo bay apela of no.
Ta asina cu si apela e sentencia, e ora ey den casacion, Corte Supremo na Hulanda, 6 Huez lo bay evalua e caso. Esey ta un procedura cu sigur lo bay dura te otro aña.
AINDA NO POR DETENE PAUL CROES
Por a compronde di mr. Illes, cu ainda Ministerio Publico no por bay detene Paul Croes. Manera DIARIO a publica, Hof a nenga e peticion di Procurador General pa laga detene Paul Croes di biaha den Corte despues di e sentencia. Esey ta haci cu Paul Croes tin 14 dia pa dicidi si ta apela e sentencia of no. Den e periodo aki e no por wordo deteni.
SI NO APELA LO BAY SERA
Despues di e 14 dianan, si Paul Croes no a apela, e por spera cu sea Ministerio Publico ta manda bis’e pa e bay KIA of Ministerio Publico ta laga detene Paul Croes pa e bay sinta su castigo. Pa loke ta Melony Croes-Paesch, si e no apela, e lo por spera cu Reclassering lo bay yam’e pa palabra con ta bay haci e 120 ora di trabao pa comunidad.
Hof a condena Paul Croes na 3 aña di prison y 8 aña sin por ta politico y funcion den gobierno. Hof a declara Croes-Paesch liber di laba placa y a condena Croes-Paesch pa a laga e muher ilegal drenta na 120 ora di trabao pa comunidad y si no cumpli cu esaki e lo mester bay 60 dia sera.
