Trias politica na Aruba ta den riesgo
ORANJESTAD (AAN): Otmar Oduber a reacciona riba comentarionan di Prome Minister cu a lague hopi preocupa. E ta considera cu e trias politica ta wordo poni den riesgo na e momentonan aki.
Prome Minister a bisa cu lo tin un protocol entre DRH y Ministerio Publico caminda ta suministra otro cu informacion. Den e cuadro aki Otmar Oduber a reta Prome Minister pa saca e protocol aki cu segun declaracion di e mandatario ta data di 2005, caminda ta permiti pa tin metemento di politica den e instituto di Ministerio Publico na Aruba.
Hustificacion di e mandatario pa e cartanan cu a sali publica caminda gobierno directamente ta pidi informacion riba casonan cu ta andando of cu a termina, pa por haya instrumento pa persegui ambtenaarnan, directornan, manera IASA, Warda Nos Costa, Brandweer y DIP entre otro, ta inaceptabel.
“Cu tin un protocol cu ta existi cu ta contra nos leynan, den e caso aki e ley di Persoon Registratie cu ta proteha informacion personal y cu no sin mas por sali for di un di e segmentonan di nos trias politica y simplemente traspasa pa otro, ta un asunto sumamente serio. Mi lo kier scucha y wak Prome Minister divulga na comunidad di Aruba e protocol aki”, Otmar a expresa.
Den e carta cu Oduber a publica y riba cual gobierno a reacciona riba dje na ningun caminda ta wordo menciona cu tin un acuerdo di cooperacion entre DRH y Ministerio Publico. E ta bisa cu no por tin un acuerdo di cooperacion of protocol pa saca informacion di casonan cu ta of no ta andando pa persegui hendenan den comunidad. Por tin protocolnan di cooperacion caminda ta duna informacion riba trabounan diario unda cu por puntra riba pasado di e persona.
Pero no manera ta e caso di corespondencia entre gobierno y Ministerio Publico. Prome Minister a pidi den un carta for di PG dia 19 di april 2023 pa sa e stand van zaken riba e investigacionnan den DIP. PG ta manda un carta pa gobierno dia 21 di april 2023 den cual e ta bisa cu Prome Minister a bise verbalmente cu e lo kier ricibi informacion adicional relaciona cu e posibel toma di accionnan disciplinario. Es decir, Prome Minister no haci uzo di e protocol entre DRH y Ministerio Publico, pero e mes, verbalmente a pidi informacion pasobra e lo tin intencion di bay persegui un director.
Relaciona cu e director aki, Jaime Croes di DIP, Prome Minister ta manda un email pa un colaborador di su oficina fecha 27 di december 2023 den cual e ta bisa cu PG a pidie pa no schorse, pasobra el a colabora bon den e investigacion di caso Flamingo y su cooperacion tabata necesario ainda.
“Dos aña a investiga penalmente DIP caminda Minister President a bisa cu e ta depolitisa DIP y ta pone tur mandato den man di director. Ta trata aki di un director cu e tempo ey a wordo investiga, pasobra lo tabatin un keho entrega contra dje, cual muy probablemente lo tabata DRH of e propio gobierno esun cu a entrega e keho. Den e mail Prome Minister ta bisa cu despues di a puntra PG diferente biaha riba e investigacion, el a wordo bisa cu su status di sospechoso lo wordo ingetrokken rapidamente. E caso no a caba ainda, a pidi pa no schorse ainda pasobra e ta papiando hopi bon den e caso di Otmar Oduber di Flamingo y despues ta bisa cu lo trek in su status di sospechoso y asina e lo por sigui haci su trabou”.
Hilaridad di e asunto aki, ta cu awe ta hiba e mesun director corte acusand’e di a tapa pa Otmar Oduber y esaki seguramente pasobra awe no tin ningun acusacion contra Otmar Oduber.
-Mientras a papia di depolitisa DIP
E persona cu a investiga e director di DIP awe ta wordo recompense como hefe.
Otmar Oduber a denuncia publicamente cu e persona cu a guia e investigacion den nomber di gobierno contra e ainda director di DIP (Jaime Croes) hunto cu DRH, awe a wordo recompensa pa bira e persona cu ta na cabes di DIP, ta trata aki di Sra. Dirksen. E persona aki a traha como consehero di Otmar Oduber tempo e tabata minister. Awe su recompense ta pa ta na cabes di un DIP cu awendia ta desastroso.
Ta trata di un DIP cu ta horta tereno di hende, cu no ta contesta hende, un departamento cu a gaba den un rapport manda pa Parlamento cu den 5 aña di tempo a duna 300 tereno di cas, di cual 95% di nan tabata hendenan cu Otmar a dunanan tereno anteriormente y awo a manda bisanan cu awo si nan ta dispuesto pa dune.
Papiando di Jaime Croes, Oduber a bisa cu e tempo ey el a wordo investiga, pasobra lo tabatin un keho entrega contra dje, cual muy probablemente lo tabata DRH of e propio gobierno esun cu a entrega e keho. PG den corespondencia cu Prome Minister lo a bisa cu e status di sospechoso lo wordo ingetrokken rapidamente siendo cu e caso no a caba ainda, pero a pidi e mandatario pa no schorse ainda pasobra e ta papiando hopi bon den e caso di Otmar Oduber di Flamingo.
Awe e mesun director aki a wordo hiba corte pasobra e lo a tapa pa Otmar Oduber.
Mirando esaki, Otmar Oduber a bisa cu durante 5 aña el a keda keto, pero e no lo keda keto mas y hopi mas cos lo sali den e dianan nos dilanti pa asina e mustra cu nos sistema ta putri.
