Prome Minister ta felicita grupo scout Ora Ubao cu 35 aña haciendo un bunita trabou

ORANJESTAD (AAN)- Grupo Scout Ora Ubao ta cumpliendo 35 aña e aña aki y den cuadro di esaki a invita Prome Minister Evelyn Wever - Croes pa participa na nan campamento cu a tuma luga den fin di siman.

Na e ocasion a intercambia diferente informacion cu e grupo Horde.

            Algun di e temanan cu a papia di dje ta e trabaonan den gobernacion, kico un Minister ta haci, kico Gobierno ta haci, con bo ta yega na eleccionnan na Aruba, eleccion na Parlamento y e diferencia entre e rol di Gobierno y Parlamento. “E tabata un mainta sumamente ameno, e muchanan tabata hopi interesa, pero pa mi e tabata mas importante pa scucha kico pa nan ta importante y e preguntanan cu nan tabatin.”

            Premier Wever - Croes a sigui bisa cu durante e encuentro a hunga un bunita wega tocante diferente pregunta di temanan etico y temanan moral. “Muchanan tin un compas moral hopi grandi y importante, cual, mayornan hunto cu lidernan di scout ta yuda pa desaroya esaki den nan.”

            Por ultimo, Prome Minister Wever - Croes a felicita Grupo Scout Ora Ubao cu e aña aki a cumpli 35 aña haciendo e bunita trabou di scout, influenciando positivamente bida di tur mucha cu ta parti di e grupo. “Pa mi e tabata un placer pa ricibi e invitacion p’esey mi a acepta e invitacion mesora. Masha Pabien y cu Dios bendiciona tur e lidernan pa sigui haci e bunita trabou aki,” Prome Minister a expresa.