Prome Minister presente na celebracion di 36 aniversario di Club Kibrahacha

ORANJESTAD (AAN): Durante siman, Prome Ministro Evelyn Wever-Croes tabata presente na e celebracion di 36 aña di Club Kibrahacha.

   “Proyectonan asina ta demostra kico por worde logra ora tin hendenan cu e determinacion y e curason na e bon luga”

   Dia 9 di September 2021, Club Kibrahacha a celebra nan 36 aña di existencia, ofreciendo nan servicio na e comunidad di Aruba.

   E celebracion aki a tuma luga riba Plaza Eric d’ Arnault na club Kibrahacha y tabata tin presente como invitadonan special; Prome Minister Evelyn Wever-Croes, Parlamentario sr. Ursell Arends, Hunta di Supervision di Club Kibrahacha; Presidente sr. Bert Kamsteeg y Board di Aruba Rotary Club sr. Frederick Nuboer.

   Durante e ceremonia oficial, Prome Minister Evelyn Wever-Croes a duna un discurso, gradiciendo tur esnan cu a tuma e iniciativa pa cu e proyecto di Club Kibrahacha. Prome Minister a duna un danki special na sr. d’Arnault cu ta un miembro honorario di Aruba Rotary Club y co-fundador di e fundacion aki. Sr d’Arnault a fungi na varios ocacion como presidente di directiva di Club Kibrahacha. 

   Prome Minister tambe a gradici señora Irene Robles de Medina cu a uni su mes na e fundacion na aña 1986, dedicando 35 aña na trabao boluntario pa e fundacion, dirigiendo un grupo di Obra di Man. Por ultimo Premier Wever-Croes a duna un danki special na e famia di Rotary Club, bestuur, raad, tur esnan cu a kere den e proyecto desde inicio y tur e voluntarionan cu a dedica nan tempo pa yuda e fundacion aki crece y bira uno exitoso.

   Premier Wever-Croes tambe tabata tin e honor hunto cu presidente di hunta di Supervision pa devela e logo nobo di Club Kibrahacha cu a ser crea pa Virginia di Freeway Aruba, y a entrega e Pin di Eric d’Arnault na Sra Irene Robles de Medina como reconocimento di su 35 añanan di dedicacion pa cu e fundacion.

   “Proyectonan asina ta demostra kico por worde logra ora tin hendenan cu e determinacion y e curason na e bon luga. Tipo di iniciativanan asina cu ta algo priva, ta yena mi semper cu hopi orguyo di ta Arubiano. Ohala Aruba por sigui conta cu bosonan pa hopi hopi tempo mas y caminda cu gobierno por yuda, nos tey dispuesto pa yuda. Masha danki pa e invitacion y hopi pabien”, Prome Minister a termina bisando