Prome Minister Mike Eman ta aplaudi iniciativa di Lago Heights Community Garden

Un hardin, un comunidad, un vision comparti

ORANJESTAD (AAN): Recientemente Prome Minister mr. Mike Eman tabata presente p’e inauguracion oficial di e Community Garden na Lago Heights Park. Como parti di e proyecto "Let's Rise Together, Let's Thrive Together", un iniciativa di Sunrise City Coconut Collective (SC3) bou di e programa Ban Biba Bario di CEDE Aruba, e hardin aki a bira un simbolo bibo di forsa, union y crecemento den nos comunidad y pariba di brug.

   Tammy Richardson, presidente di Sunrise City Coconut Collective a señala cu e trayecto di e proyecto a cuminsa na mei di aña pasa, cu un vision cla pa traha hunto y crea algo valioso pa nos comunidad.  “E proyecto aki tabata berdaderamente p’e comunidad y door di e comunidad. For di e prome diseño te na e ultimo plantacion, nos boluntarionan dedica tabata e motor tras di e transformacion aki” Richardon a remarca.

   E area tabata den un estado di abandono pa varios aña, awor porfin ta mira un luz positivo.

Anand Sueman cu tabata un figura clave den e proyecto tambe a destaca cu e inauguracion di e hardin comunitario ta un prueba di loke pueblo por logra ora nan traha hunto. Segun Sueman, e hardin no ta solamente un espacio berde, pero un simbolo di union, compromiso y sostenibilidad. Ademas el a enfatisa cu e exito di e iniciativa ta basa riba e forsa di e boluntarionan, kende a contribui cu nan tempo y energia pa haci e vision realidad.

   Prome Minister mr. Mike Eman a comparti tambe un mensahe inspirador poniendo enfasis cu Gabinete AVP-Futuro tin un meta pa planta 100 mil mata na Aruba den e añanan benidero. E berdadero forsa di un comunidad ta den su hende, den e boluntario cu ta haci un diferencia.

   “Nos kier a gradici tur hende cu a contribui cu nan tempo, energia y recurso pa haci esaki posibel. Sin boso, esaki no tabata bira realidad!” e mandatario encarga cu medio ambiente y naturalesa a exclama. Ademas di palabra inspirador e boluntarionan a haya certificado di aprecio. Prome Minister mr. Mike Eman hunto cu e boluntarionan y su consehero pa maneho di naturalesa y medio ambiente Francielle Lacle a planta un mata di fruta pa culmina e inauguracion.