*Gobierno di Aruba tin 23 cacho cu ta duna servicio na e comunidad
ORANJESTAD (AAN): Diahuebs 11 di juli, Prome Minister Evelyn Wever-Croes a reuni cu DRH y representantenan di Aduana, KIA y Cuerpo Policial referente e K9 Unit di Gobierno di Aruba.
Prome Minister a splica cu ya pa hopi aña Aruba tin un K9 Unit.
Actualmente Gobierno di Aruba tin 23 cacho cu ta duna servicio na e comunidad. Nan ta traha cu Aduana, KIA y Cuerpo Policial. Cada departamento tin su propio maneho cu su propio reglanan y algun mas beneficioso cu otro.
Prome Minister a duna di conoce cu algun siman pasa el a wordo notifica di reto- y problemanan cu tin bou ehecucion di maneho actual y di biaha a reuni pa trata esaki. DRH (Departamento di Recurso Humano) a lidera e trabounan pa un maneho nobo hunto cu sindicatonan di Polis, Aduana y KIA.
Prome Minister tabatin e honor di a ricibi e proposicion di e maneho nobo y a keda hopi satisfecho cu ne. Un motibo principal pa e maneho nobo ta pa pone e bienestar di e cacho na prome luga.
Aruba tin un Ley di Cacho y tur animal na Aruba mester wordo trata na un forma digno y esey tambe ta conta pa e cachonan cu ta den servicio di Gobierno di Aruba, y cu e maneho nobo aki lo garantisa esey tambe.
“Mi ta gradici KPA, Aduana, KIA, e sindicatonan SADA, SPA, SEPPA, y DRH cu a traha hunto riba e maneho nobo aki y awe a presenta e proposicion. Awor nos ta buscando e consehonan huridico y financiero pa asina finalisa esaki. Esaki ta un ehempel di cu ora traha hunto, cera cabes y atende cu retonan mesora, nos ta yega na solucionnan cu ta na bienestar di nos tur”, Prome Minister a remarca.
