Fraccionnan AVP den Parlamento 2009-2017 tabata avestruz??
- Sentencia den caso Benny awe, ta exigi retiro politico di top AVP
• Fracaso di Citgo, scandal y debe nacional ta herencia di AVP!
ORANJESTAD (AAN) Fecha 12 di Juli 2024 na tur forma ta keda e fecha den cual Corte di Husticia di Aruba mester pronuncia un sentencia cu directamente ta mishi cu e fundeshi di e sistema politico di Aruba den tur aspecto.
Awe na e momento cu Corte di Husticia pronuncia su veredicto, no solamente un representante oficial di Pueblo di Aruba enfrente mundo, lo ricibi un contesta, pero historia politico moderno di Aruba lo por tembla den su fundeshi.
Awe no ta asunto solamente cu den Corte di Husticia, den e caso di apelacion di e sentencia di Huez den Prome Instancia, ta wordo dicidi si Benny Sevinger siendo Ministro di Aruba, a haci su mes culpabel na hechonan cu ta contra Ley.
Awe un sentencia mester determina, si e dirigentrenan di AVP y sigur e personanan cu durante 2009 pa 2017 tabata representa e partido aki den Parlamento, moralmente por presenta nan mes atrobe na Pueblo di Aruba y pidi confiansa di e votadornan Arubano, pa nan representa e Arubiano den Parlamento di Aruba.
Caso Avestruz no ta papia simplemente di e posibilidad cu Benny Sevinger no a coresponde na e grado di integridad cu por spera di un politico den funcion publico.
Den e Caso Avestruz ta papia di un partido politico y tur su representantenan den Parlamento, den Partijraad, den directiva y den Gobierno, cu atrobe no a capta e peliger grandi cu Aruba tabata enfrenta y un caso cu ta tuma lugar bao nan nanishi y den nan ambiente directo.
Awe ora papia di e Caso Avestruz, ta papia di e persona cu por considera e sombra di lider di partido AVP, Mike Eman, cu a exigi pa Benny Sevinger den prison, bay riba lista politico di AVP y wordo eligi representante di Pueblo di Aruba.
Ora ta papia di e caso Avestruz, ta papia di Benny Sevinger, cu hunto cu Mike Eman mester a dirigi e fondo di 1.6 Biyon cu sin ningun control miembronan di Parlamento di AVP, a entrega na Mike Eman y Benny Sevinger y cu awe a bira uno di e motibonan cu Pueblo di Aruba mester paga pa e sumanan enorme di proyectonan di Bo Aruba.
Si awe e sentencia di Huez dicidi cu Benny Sevinger a haci su mes culpabel, kico esaki lo nifica pa e Arubiano cu na 2013 a base di e publicidad cu tabata wordo duna na AVP, a entrega su confiansa total na politiconan di AVP, cu a haya un mayoria absoluto den Parlamento di Aruba?
Na 2014, Hulanda a bati na porta pa deshaci di autonomia financiero di Aruba, a base di e mal gobernacion financiero di Gobierno Mike Eman, cu a hinca Aruba den un debe nacional y den estado di bancarota.
Si pone fechanan hunto, por nota cu ta na momento cu Pueblo di Aruba tabata wordo ciega den publicidad pa bolbe pone Gobierno Mike Eman na poder, e Avestruz lo tabata come na Aruba.
Miembronan di Parlamento ta hura cu nan ta sirbi interes di Aruba. Kico a pasa cu e interes di Aruba na 2013, ora segun acusacionnan, e avestruz tabata come?
Cu na 2017 AVP mes a dicidi cu el a perde confiansa di e Pueblo di Aruba, cu na 2013 a entrega e victoria grandi, ya tabata tin motibo pa miembronan di e partido introduci un cambio den dirigentenan di e partido.
Si awe resulta, cu Corte di Husticia tambe ta sostene e acusacionnan contra Benny Sevinger, democracia ta exigi, pa ningun di e personanan cu Aruba a eligi den su Parlamento pa representa Pueblo y cuida bienestar di e pais durante e periodo di 2009 pa 2017, bolbe pone nan mes disponibel pa vigila bienestar y interes di Aruba.
Un miembro di Parlamento tin e deber sagrado, pa basa su trabau riba su propio vigilancia haciendo uzo di tur su derechonan pa evita loke a pasa.
Caso Avestruz no ta e unico caso cu ta papia un palabra cla contra fayo di vigilancia di parti di e representacion a base di mayoria absoluto di voto cu AVP a haya pa goberna.
E aprobacion di AVP y e exigencia pa mantene un persona condena na castigo di prison den Parlamento di Aruba, ta increibel.
Democracia ta mucho mas cu hinca Pueblo den euforia. Democracia ta, e forma cu ta duna respet y sigura bienestar pa Pueblo y Pais.
Awe Corte di Husticia lo pronuncia un sentencia historico. Si den e sentencia di Corte di Husticia resulta cu e Avestruz a cana na Aruba manera e acusacion ta presenta, tur cu a representa Pueblo di Aruba den Parlamento desde 2009 pa 2017 y no a descubri presencia di e Avestruz, mester saca nan conclusion, loke ta inclui cambio total den e top di AVP!
