Diabierna contratistanan ta entrega oferta pa fase 2
ORANJESTAD (AAN): Minister di Asuntonan Economico, Desaroyo Sostenible y Comunicacion Geoffrey Wever Dialuna a duna un update riba e desaroyonan den centro di ciudad di Oranjestad.
E mandatario a cuminza papia riba e concurso relaciona cu nomber di e plaza den Colombusstraat y Wilhelminastraat, unda cu ya caba mas cu 250 registracion a drenta di ciudadanonan cu a pensa riba un bon nomber pa e plaza.
Wever a gradici tur hende cu a tuma tempo pa participa y el a indica cu e nombernan cu mas frecuentemente a bin dilanti lo bay pa e asina yama ‘straatnamencommissie’ y den comienzo di luna di Januari lo revela cua lo wordo uza pa bira e nomber di e plaza.
Pa loke ta e proyecto mes di Wilhelmina straat y Columbusstraat, e minister a bisa cu siman pasa Diabierna e caminda a habri bek y awor e trafico por bin bek den Wilhelminastraat.
“E proyecto ta casi cla y e siman aki mes e lo wordo entrega”.
Falta solamente e trottoirnan den Wilhelminastraat.
Nos ta gradici e comerciantenan den e area pa nan pasenshi.
Lamentablemente nan a sufri durante e proceso di construccion, cu tabata tin un tardanza adicional tambe, segun e mandatario.
El a haci un yamada na tur ciudadano pa bay bek den centro di ciudad y yuda e comerciante gana bek locual nan a perde y mas.
Segun Wever, e di dos fase di e proyecto ta e parkinglot completo te cu Lagoen, unda cu ta bay tin mas lugar pa hende staciona nan auto y ta bay tin mas luz.
El a splica cu Diabierna e contratistanan ta bay entrega nan oferta pa e proyecto, despues di cual Gobierno lo scoge e ganador di esaki pa ehecuta e proyecto.
Segun Wever e fondonan ta aproba y tey caba, pa asina na comienzo di Januari por cuminza cu e proyecto.
“E ora ey nos ta bay tin un proyecto integral, unda cu full e area ta bay ta remodela, bunita y cu hopi luz y mata”.
Asina nos ta spera di por cuminza cu e parti di revitalizacion di centro di Oranjestad, segun Wever.
