Prome bishita di crusero luhoso Explora I cu un capitan femenino

ORANJESTAD (AAN): Tabata Dialuna mainta cu e barco crusero ‘Explora I’ a drenta Waf di Playa pa prome biaha.  Special pa e ocasion aki, el a ricibi saludo di “cañon di awa” for di e remolcadornan di Aruba Ports Authority.

   MSC Explora I ta representa un epoca nobo di viahe luhoso riba lama.  El a wordo diseña cu promesa di elegancia, exploracion, placer, y descubrimento.

   E barco aki ta relativamente nobo, y apenas dia 1 Augustus 2023 el a tene su viahe inaugural for di Copenhagen (Dinamarca).  Esey a marca e comienso di un serie di itinerario cu a cubri tres continente, ofreciendo huespednan un contacto completo di cultura y descubrimento na cada waf cu nan bishita.

   E barco tin largura di 248 meter, cu 461 Suites cu bista pa lama, 9 restaurant, 3 piscina pafo y uno paden.  E tin capacidad pa maximo 900 huesped.

   Algo fantastico ta cu e barco tin un capitan femenino, esta Capitan Serena Melani kende ta conoci pa tin balor grandi pa cu respet pa oceano y naturalesa, y un pasion pa exploracion.  Capitan Melani ta trata di tin hopi contacto tambe cu huespednan abordo.  E ta un persona cu hopi experiencia, y a bira e prome capitan femenino cu a saca un barco crusero for di e fabrica, cu ta representa vision di e linea crusero di ta mas diverso y inclusive.

   Capitan Melani lo ta alternando e puesto di capitan cu un otro, esta Capitan Diego Michelozzi kende tambe ta bin for di cuatro generacion di famia cu a traha riba lama.

   MSC Explora I a bishita Aruba como parti di un viahe di 6 dia one-way for di Miami pa Cartagena (Colombia).  El a sali Diabierna 5 di Januari 2024 di Miami, y riba Dialuna 8 di Januari a bishita Aruba.  Diamars 9 di Januari el a bishita Santa Marta.  Diahuebs 11 di Januari, e pasaheronan lo ta bahando na Cartagena.