Natasha Gilkes, directora FPNM:
*Ta cuminza den Distrito San Nicolas
ORANJESTAD (AAN) – Directora di Fundacion Pa Nos Muchanan, Natasha Gilkes, tambe a hiba palabra den e conferencia di prensa tocante e traspaso di e Programa Stimami, Guiami, for di Kiwanis Club Palm Beach pa FPNM.
Gilkes a cuminza pa recorda cu Fundacion pa Nos Muchanan a wordo funda dia 12 di Juni, aña 1991, cu e vision di un Aruba uni, pa e desaroyo sano di tur nos muchanan na Aruba, lantando den un ambiente safe. “Y esaki nos ta logrando pa medio di ofrece guia, sosten y desaroyo profesional na tur persona cu ta traha den centro di cuido di mucha, pero tambe door di ofrece sosten na tur mayor y yiu den edad di 0 pa 12 aña. Pa e motibo aki, e lema di e Fundacion ta ‘Educacion cu un base firme’. Nos ta compara esey cu ora nos ta construyendo nos cas”, Natasha Gilkes a expresa.
El a perfila esaki bisando cu na momento cu bo ta construyendo bo cas, bo ta percura cu e fundeshi ta fuerte, stabil, unabes cu esaki ta e caso bo ta pone blokinan, djey ringbalk, djey e dak anto e cas ta completo.
“Pero si acaso e fundeshi no ta fuerte, kico ta pasa ora bo ta pone e blokinan? E ta tambalea, y esaki ta netamente loke nos kier preveni ora ta trata lantamento di nos muchanan. Pa e motibo aki, e Programa ‘Stima bo yiu, Guia bo yiu’ ta enfoca riba muchanan entre e edad di 0 pa 4 aña. De e forma aki nos ta percura pa e mayornan di e muchanan aki cu informacion, herment y tools, p’asina hunto, nos por ofrece e guia necesario pa percura pa e muchanan aki tin un fundeshi fuerte, cu ta hopi importante pa resto di nan bida”, Natasha Gilkes, directora di FPNM a señala.
Stimami, Guiami ta un programa cu a inicia na aña 2021 como un proyecto piloto, y esaki a sigui tambe na aña 2022. “Despues, na 2023, nos a continua cu Stimami, Guiami como un programa cu na September di e aña aki, Kiwanis Club Palm Beach a haci e traspaso oficial di e programa na FPNM, cual nos a tuma cu man habri. Nos ta kere firmemente den e programa aki, y nos por mira tambe e exito di delaster aña di e programa aki; un total di 70 mayor a participa, y nos ta premira cu hopi mas lo participa tambe.
Loke ta haci e aña aki diferente ta cu nos lo ofrece e programa den e distritonan (barionan) na Aruba. Y esaki ta bay inicia den luna di Maart na distrito di San Nicolas”, señora Gilkes a duna di conoce.
El a agrega cu FPNM a scoge pa haci esaki, pa ta mas cerca di e mayornan. Y haci esaki den e bario cu nan ta biba ta haci mas facil pa nan participa tambe.
Natasha Gilkes a gradici tur e colaboradornan cu desde inicio di e Programa ta colaborando firmemente cu FPNM pa asina ofrece esaki. Nan ta entre otro, Centro pa Hoben y Famia, Tienda di Educacion, Stichting Wit Gele Kruis y Fundacion Respeta Mi, y tambe a gradici tur e trainernan. Y claro, na Kiwanis Club Palm Beach cu ta kere firmemente den e programa aki mescos cu FPNM. Danki pa e sosten di semper y pa e donacion pa nan por sigui duna “Stimami, Guiami” na Aruba.
