Programa di ‘Caribbean Summer Court’ a cuminsa atrobe

Ofreci door di Corte Comun di Husticia

ORANJESTAD (AAN): Corte Comun di Husticia di Aruba, Curaçao, Bonaire, y St. Maarten, St. Eustatius, y Saba ta organizando un biaha mas e asina yama ‘Caribbean Summer Court’.

   Ta trata aki di un stage cortico pero intensivo pa studiantenan universitario di ley den Caribe.  Caribbean Summer Court ta specialmente destina pa studiantenan universitario di Ley cu tin resultadonan mas halto cu promedio, y cu a pasa (parti di) nan infancia riba islanan den Caribe.

   E aña aki tres lugar di stage a bira disponibel, unda e stagiairenan ta trata simultaneamente.  Durante e stage aki, e candidatonan lo bay conoce profundamente e trabao hudicial y lo wordo asigna na departamentonan di Derecho Civil, Derecho Penal, y Derecho Administrativo.  Na final di e stage, e stagiairenan lo ricibi un certificado di participacion.

   Pa e edicion aki, e studiantenan Aline Abdul di Universidad di Curaçao, Jarelix Chirino di Universidad di Tilburg, y Dayen Doran di Universidad di Leiden a wordo selecciona pa core stage na Corte Hof.

   Riba nan prome dia di stage cu tabata Dialuna 12 di Augustus 2024, e studiantenan a presta huramento como griffier door di Maroeska Scholte, vice-president di Corte Comun di Husticia.  Ademas nan a ricibi un babero cu nan nombernan borda riba dje.