Prijs di petroleo ta mantene control riba produccion mundial manca ----*Agricultura, pesca y cria ta bira esencial pa bienestar di comunidad ---*Hende mester bolbe campo y lama pa industria y oficina por sobrevivi
ORANJESTAD (AAN) — Na 2020, ora mundo a cay den e abismo di e pandemia provoca pa e Coronavirus nobo, un terminologia nobo a haci su entrada.
“E normal nobo” tabata papia di loke ta spera mundo for di 2020, ora loke hende a pensa cu ta imposibel, a tuma lugar.
Tur planificacion na mundo a basha abou. Sistemanan cu mundo a adopta como base di normalidad, a stop di existi.
Gobiernonan na careda mester a cambia tur cifranan di paisnan loke a haci cu for di e momento, hende mes mester a realisa, cu nada lo ta mescos cu prome cu e atake di Covid-2020, pa un periodo hopi largo.
Hende cu ta centro di produccion mundial, a wordo ataca. Hende a perde control riba su salud, cu ta nifica contra su bida, su trabou, su entrada, su negoshi, su produccion y su cuminda.
Pero hende te awe no kier realisa, kico ta nifica e “normal nobo”, cu a cuminsa cu e momento cu paisnan a habri nan portanan atrobe pa actividadnan economico cu mester a wordo paralisa pa hende sobrevivi y hasta pa resta hende pa haci trabou.
Hende a produci menos cuminda. Pero hende a produci tambe menos placa pa e por cumpra cuminda. Gobiernonan rond mundo mester a duna hende cuminda, si nan tabata tin placa pa haci esaki of por a presta placa pa alimenta nan poblacion.
E circulo economico di e productor di articulonan pa e hende cu ta cumpra articulonan, a wordo afecta.
Ta e placa cu cual hende ta paga, ta haci posibel pa comercio sigui exporta y importa y sigur un pais manera Aruba a bira, mester tene esaki na consideracion.
Aki concientemente nos ta papia di “Aruba a bira” pasobra Aruba no ta e Aruba di un siglo atras ni sikiera e Aruba cu a bira pais autonomo.
Nos mester bolbe na 1986, ora e pais “Aruba” a hace como resultado di Status Aparte pero sin e economia cu a wordo planifica pa Status Aparte y a tene na consideracion un crecemento gradual, na Aruba.
E salida di Lago, despues cu gobierno di Venezuela a nenga Lago un prijs preferencial, a deshaci di un parti enorme di economia di Aruba.
Un cantidad di ciudadano a bay Hulanda pa por a sostene nan mes, mientras Aruba tabata busca un solucion, cu a wordo introduci den forma di turismo.
Sinembargo, no por a papia di desaroyo di turismo pero di “explosion” di turismo cu despues a pone hasta Reino na careda.
E cantidad di ciudadano di Aruba a crece enormemente y sigui crece mientras mundo tabata despedi di Epoca di Oro, di Petro Dollar y di hopi soño cu a bira problema.
Den e “roller coaster” mundial, bida social na Aruba a conoce demanda pa infrastructura di cas, trabou, etc., den un mundo cu a drenta recesion internacional na 2007.
Atrobe planificacion tabata invisibel na 2009 y Aruba atrobe tabata un paraiso pa fantasia.
Awe Aruba mester drenta un normal nobo, cu ta nifica cu tur hende mester adapta nan mes na e situacion mundial di crisis di pandemia (cu ainda sigur no a termina), di crisis petrolero, crisis financiero y asina nos por continua.
Den e situacion aki, prijsnan ta subi y den e prijsnan aki sigur prijs di cuminda cu hende mester pa sigui biba.
Den e normal nobo, cu no tabata un piñata, pero un adaptacion na menos entrada na tur nivel mundialmente, alimento ta central den tur comunidad.
Un pais manera Aruba cu ta depende di importacion, mester paga pa produccion pero tambe transportacion y tur gasto di importacion y hasta exportacion di e pais di origen di producto.
Den pasado, Aruba tabata tin produccion di cuminda pa medio di agricultura (horticultura), pesca y cria.
Awe pa hende por sigui traha den oficina, den tienda, den hotel etc., mester tin produccion di cuminda sigur si tene na consideracion e aumento di instabilidad mundial, cu ta nifica insiguridad mundial pa loke hende por pone riba mesa como alimento pa cual na un forma of otro e mester paga.
