ORANJESTAD (AAN): Daryl Lue ta manager di e tres plantanan di procesamento di awa residual na Aruba, RWZI (Rioolwaterzuiveringsinstallaties) a reitera cu e planta di Bubali ta over-capacita.
E planta aki ta hayando 8 mil kuub pa dia (8 miyon liter di awa) y su diseño ta pa 4.500 kuub pa dia (4,5 miyon liter pa dia), a bisa.
Mirando e TNO Rapport cu a wordo saca, mester 500 kilogram di zuurstof pa dia. Cu e sistema cu tin aworaki, ta hincando 250 kilogram di zuurstof pa dia locual ta nifica cu ta hincando 50 % so. Pero mirando cu e situacion di Bubali ta precario, e planta mes tin 50 aña bieu, y tambe e ekipo den dje tambe tin mesun cantidad di aña, por ripara tambe cu esey tin su efectonan riba e oxigeno den e awa, Lue a indica.
El a sigui bisa cu haciendo esey na 2018, DOW a bin cu un sistema nobo, mas moderno pa hinca zuurstof (oxigeno) den awa. Esaki ta pa reduci e holo un tiki y tambe pa purba optimalisa e proceso.
Na 2019, a agrega, a inyecta un sistema kimico. Mirando cu e bacterianan no haya suficiente zuurstof ta produciendo bacterianan cu ta drif. E kimico aki ta purba evita cu e lodo ta bay over den Bubali Plas. Ta inyecta esaki na final di e proceso pa asina retene tur e lodo den e awa, den e sistema.
Den 2020 a haci un inversion di 3,8 miyon florin pa cu e tres plantanan. DOWa cumpra diferente ekipo pa zorg cu ta cumpli cu e normanan di bacteriologia. Tambe a percura pa bin cu algun pomp nobo. A inverti den un sistema cu ta meld ora cu awa ta subiendo caminda. E sistema aki lo por preveni esey door cu den e cashi nobo tin un sistema di telemetria cu ta duna señal, a splica.
Un pomp cu cay afo, e sistema lo por duna un señal na e piket dienst pa asina atende cu e situacion. Tin un periodo di mas o menos 2 ora pa 'overbrug' y den e caso aki por bay over pa elimina of minimalisa e cantidad di awa sushi cu ta bin ariba caminda, e experto a indica.
Na 2021, a señala, den e 3,8 miyon florin a pone un suma disponibel pa e reparacion di e tank, cual tabata tin cracknan caba cu tabata tumando lugar den dje cu esaki lo por tabata un causa cu esaki kibra lo tin 8 miyon liter di awa sushi riba e area turistico.
Esaki lo por tabata tin un impacto hopi negativo pa Aruba. Esaki ta algo cu ta den pleno ehecucion y ta premira pa caba fin di November. Ora di caba ta elimina un menasa pa e becindario, Daryl Lue di DOW a remarca.
Esey no ta kita cu e holo ta keda, pero esaki ta djis pa retene pa e desaster no pasa.
Di e 3,8 miyon florin, a ricibi caya 85 % di e material cu a pidi, den cual 65 % caba a instala y a instala 75 % caba di e pompnan cu nan a ricibi den tur tres planta
Lue a splica den detaye kico tur ta wordo haci na e momentonan aki pa loke ta ekipo, infrastructura como tambe procesamento di awa.
