Prinses Beatrix a activa logo nobo di Telefon pa Hubentud

ORANJESTAD (AAN): Recientemente Fundacion Telefon pa Hubentud Aruba a ricibi bishita di Prinses Beatrix.

Durante su bishita na Fundacion Telefon pa Hubentud Aruba Prinses Beatrix primeramente a ricibi informacion di diferente proyecto cu Fundacion Telefon pa Hubentud Aruba ta implementando.

   El a ricibi informacion tocante e proyecto Prevencion di Termento na Scol, Best Dad Ever, Esaki ta bo Derechonan, Unicef Kinderrechten Filmfestival, I Stopped It y otronan.

   Tambe Prinses Beatrix a ricibi informacion tocante e servicionan di telefon, email y chat cu e mentornan ta duna y tur e trainingnan cu e mentornan ta ricibi henter aña. Tambe Prinses Beatrix a ser informa tocante e yamadanan cu e muchanan di e islanan di Bonaire, St. Eustatius y Saba ta haci for di nan isla y cu ta ser contesta door di 131.

   Fundacion Telefon pa Hubentud Aruba ta preparando e organizacion pa su proximo 25 aña. Un di intrumentonan importante pa sigura esaki ta su logo. Aña pasa Fundacion Telefon pa Hubentud Aruba a organiza un competencia di pintura bao di muchanan di ocho scol basico y cinco scol secundario. E pintura di e ganador overall di e competencia a ser hinca den un formato profesional door di un diseñador profesional.

   E logo ta ilustra un mucha, hoben, adolecente. E logo ta ilustra hende muher y hende homber. E logo ta e mucha, e hoben, e adolecente cu ta busca/ ricibi asistencia na nos organizacion. E color blauw ta ilustra e derechonan di mucha cu nos organizacion ta funda ariba dje y ta para pe. E outline blauw cu ta forma e mucha/ hoben/ adolecente ta ilustra cu e asistencia di 131 ta rond di e mucha/ hoben/ adolescente, y ta protege e mucha/ hoben/ adolescente contra di tur locual ta stroba su desaroyo y ta strobe di disfruta di su derechonan.

   Durante e bishita di Prinses Beatrix, Prinses Beatrix hunto cu e ganador overall cu ta Sophie-Belle Rafini y Cesar Trovat cu ta di e Consejo Hubenil di Fundacion Telefon pa Hubentud Aruba, a revela e logo nobo. Na final Prinses Beatrix a hiba un combersacion cu e dos hobennan tocante e bida di un hoben aki na Aruba.

   Prinses Beatrix a keda sumamente impresiona cu tur e trabao cu Fundacion Telefon pa Hubentud Aruba ta haci pa nos muchanan, hobennan y adolescentenan. Tambe el a keda sumamente contento di mira cu e muchanan y hobennan di e islanan di di Bonaire, St. Eustatius y Saba tambe por tin un opinion y por expresa esaki pa medio di e asistencia di Fundacion Telefon pa Hubentud Aruba.

   Fundacion Telefon pa Hubentud Aruba kier a gradici su diferente partnersnan cu ta tuma nan impacto social na serio y ta inverti den e muchanan y hobennan.