Unda control riba prijs di macuto basico ta?
ORANJESTAD (AAN) – Consumidornan no ta nada contento cu e manera con a subi di prijs practicamente tur producto di consumo basico, un di nan ta e caha di webo, cu ta suppose ta parti di e macuto basico.
Un dozijn di webo su prijs ta varia entre 8.75 cu 9 florin, segun cual supermercado e consumidor ta bishita. Pero si ta un producto cu prijs proteha, mester tin un prijs standard pa caha di 12 webo. Ta parce cu na Aruba si ta existi e “webonan di oro” pa consumo familiar.
Kiermen, cu no tin control mas riba e productonan cu ta pertenece na e macuto basico. Y asina por sigui papia di tur otro producto, entre nan azeta dushi, te hasta aroz.
E ta increible e manera con e costo di e productonan a subi, ademas di e pan cu mester rindi'e masha hopi mes, pasobra no tur dia tin 5 y pico florin pa cumpra un kipashi, y menos si ta un famia unda tin mas cu un of dos yiu.
