ORANJESTAD (AAN): Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 11 september 2024:
Gasoline unleaded-premium ta baha cu 6,4 cen, pa wordo bendi awor na 251,2 cen pa liter.
Diesel LS ta baha cu 10,5 cen, pa wordo bendi awor na 210,2 cen pa liter.
Kerosin ta baha cu 14,9 cen, pa wordo bendi awor na 186,8 cen pa liter. Tur e prijsnan ta inclui BBO/BAZV/BAVP.
Prijs di gasolin ta bahando na varios pais, incluyendo na Merca. Tur esaki tin di haber cu prijs di crudo ta mas abao cu normal. Tarifa di petroleo a cay ultimo luna y mey, y pesey bo ta nota cu awor prijs di Gasolin y Diesel tambe ta cay.
Prijs pa bari di crudo West Texas Intermediate na Merca, a baha cu mas di 10% compara cu comienso di Juli 2024. Tin menos demanda pa petroleo for di China (un consumidor top di crudo), y esaki hunto cu un economia cu ta birando lento, a yuda cu prijs di gasolin ta bahando den e hemisferio aki.
Tirando un bista na otro isla- y paisnan den Caribe, por nota cu prijs di combustibel tambe a baha na varios di nan. Na Jamaica, ya for di 22 di Augustus e prijs pa liter a cuminsa baha, y siman pasa dia 5 di September, e tarifa a baha aun hopi mas.
Na Cayman Islands tambe, prijs di gasolin a baha awor na September, compara cu e nivel halto cu e tabatin na Augustus. Na Republica Dominicana e prijs a keda mescos, desde cu Gobierno ta subsidia esaki pa yuda baha inflacion na e pais.
