Logro historico financiero di Aruba ta exigi respet mutuo pa cooperacion
- Problema cu taxi tabata e prueba grandi cu algo tabata robez
- Trankilidad politico necesario den situacion mundial peligroso
ORANJESTAD (AAN) “Loke gobiernonan presidi pa Prome Ministro Evelyn Wever-Croes a alcansa pa Aruba, ta un logro grandi. Ta conoci cu mundo a confronta problemanan serio durante ultimo decadanan mientras cu na entrada di Gobierno Wever-Croes e fantasia di entrada di Citgo cu lo a genera un crecemento economico historico, a resulta den medidadanan urgente cu mester a wordo tuma pa evita cu Florin lo a zink.”
Declaracion haci pa un experto cu kende DIARIO a discuti e situacion actual cu a surgi na Aruba cu caida di Gobierno Wever-Croes.
E resultado di eleccion riba cual Gabinete Evelyn Wever-Croes 2 ta forma, tabata prueba di e sosten di Pueblo di Aruba pa e team dirigi pa Prome Ministro Evelyn Wever-Croes, kende a duna prueba di liderazgo pero tambe di inspiracion di confiansa cerca e Pueblo di Aruba.
Informantenan ta indica cu tabata necesario forma un coalicion pa gobernacion y cu e opcion MEP/RAIZ tabata parce esun cu mas exito, pero lamentablemente tambe a produci varios momento cu relacion entre partnernan di coalicion a bira discutibel.
Manera a keda presenta na DIARIO, den politica mester mira loke ta importante pa Pueblo y e creacion di politiconan popular, no ta cuadra cu e percepto basico di democracia mientras mester tene na e loke ta pensamento di Pueblo y no di politico.
Tabata tin varios momento cu cierto politiconan di RAIZ, tabata presenta posicionnan cu no tabata cuadra cu e pensamento real di e Arubiano riba terenonan sumamente importante.
Den un coalicion, balanza di poder mester wordo busca den e resultado directo di eleccion y no den e posibilidad pa un solo miembro di un coalicion cu un pensamento propio, exigi pa un partido mucho mas grandi y cu a haya encargo di Pueblo, crea e impresion cu e ta e figura central den e procedura democratico cu ta culmina den formacion di un Gobierno cu un mayoria den Parlamento.
“Politica a wordo inventa pa sirbi Pueblo y no pa hende crece,”a wordo mustra na DIARIO.
Raiz mester a adapta su mes na e base cu Gobierno Wever-Croes a alcansa na 2020, ora ya e situacion financiero deplorabel di Aruba a wordo transforma di creacion di un debe nacional pa creacion di solucionnan financiero pa Aruba, manera introduci dor di Gabinete Evelyn Wever- Croes 1, cu Pueblo a duna continuacion den Gabinete Wever-Croes 2.
Informantenan a papia di hasta situacionnan cu lo por wordo cualifica como arogancia politico di cierto miembronan di RAIZ.
E problema di taxistanan di algun tempo pasa,. Claramente a duna prueba di e distancia entre e dos partidonan den Gobierno, cu ta basa riba e apoyo cu Pueblo di Aruba a duna na MEP como e partido mas grandi y Raiz cu ta un partido cu a bira necesario den gobernacion pa por a forma un Gobierno di mayoria.
Awor e situacion a rementa pero no ta prome bez cu por nota un distancia grandi entre e dos partidoan cu a forma e Gabinete Evelyn Wever-Croes 2.
Pa bolbe riba e problema di taxi claramente por a mira con Prome Ministro Evelyn Wever-Croes, conoci pa e forma cu e ta soluciona conflicto grandi, a hala un banda aunke hasta ta un realidad reconoci na Aruba, cu un grupo grandi di taxista ta MEP.
E habilidad di Prome Ministro Wever-Croes pa yega na entendimentonan, claramente no a wordo usa manera e por a wordo usa aunke ta e ta e lider cu segun regla democratico Aruba a scoge pa dirigi Gobierno.
E situacion cu a surgi awor ta wordo considera inaceptabel pasobra RAIZ mester respeta decision cu a wordo pone a base di acuerdo di gobernacion na MEP.
Segun informantenan clave ta na su lugar, pone un fin na e coalicion ta na su lugar den un situacion instabil mundial marca pa entre otro desaroyonan na Venezuela y situacionnan mundial.
Por papia di situacionnan mundial peligroso, cu hasta peliger den porta di cas di Aruba, Venezuela, cu actualmente conoce problema cu su sistema monetario tambe, y cu mester di atencion di Gobierno cu no ta den su porta.
Gobierno di Reino sigur tin motibo di ta preocupa den e situacion actual debi na e continuacion di Gobernacionnan di Evelyn Wever-Croes, cu ta duna resultado importante pa bida social, financiero pa poblacion di Aruba, cu no ta wordo sirbi cu desaroyonan manera esnan actual den coalicion cu no por stroba e desaroyo positivo di Aruba durante manehonan di Gobierno Wever-Croes cu guia di Hulanda.
Eleccion ta e mihor opcion den e situacion crea pa Raiz, manera a bini dilanti.
