Minister Glenbert Croes: Eagle NLG ta na Aruba
- Aruba lo haya Heavy Fuel Oil mas barata for di Venezuela
ORANJESTAD (AAN) Ehecutivonan di Eagle NLG lo ta na Aruba awe Diabierna 28 di Juni. Asina Minister di Labor, Energia y Integracion a duna di conoce den un entrevista cu DIARIO.
E mandatario a subraya cu e proyecto ta sigui y ta necesario p’asina Aruba por elimina Heavy Fuel Oil den dos aña, cu lo switch pa gas natural, p’asina mantene prijs di awa y coriente abao.
“Prijs di awa y coriente ta bay baha drasticamente, den e di dos mita di e aña aki, danki na licencia OFAC cu Gobierno Mericano cu ta permiti Aruba cumpra heavy fuel oil di Venezuela, cu ta mas barata”, Minister Glenbert Croes a menciona.
El a bisa cu segun specificacion di WEB Aruba NV, specificamente, for di Refineria El Palito, nan ta haciendo lo maximo pa Eagle LNG ta parti integral di e vision cu Aruba tin di e transicion energetico pa desencarboniza Aruba su economia, elimina of baha e emisionnan pa aña 2030 cu mas cu 60%, p’e ta carbon neutro pa 2050, y Eagle LNG ta esencial den full e plan aki, hunto cu expansion di panelnan solar y otro actividadnan energetico cu ta bin cu Repsol Oil & Gas. “Eagle LNG ta nifica momentonan grandi y briyante”, Minister Glenbert Croes a señala y a agrega cu e tereno pa Eagle LNG ta cla.
