Rubiella Toppenberg, Trahado Preventivo di FADA:
ORANJESTAD (AAN) Den un lectura cu Rubiella Toppenberg, Trahado Preventivo di Fundacion Anti Droga Aruba (FADA), a haci pa invitacion di Cuerpo Policial, un biaha mas el a trece informacion dilanti na pueblo di Aruba, mirando cu tin algun siman tras di otro cu basta tristeza, cerca basta famia, atrobe pa motibo di uzo y abuso di alcohol. Den e prome cinco lunanan di 2024 no menos cu seis accidente fatal, den trafico, a tuma lugar.
“FADA pa hopi aña caba ta para tras di concientizacion prevencion pa loke ta uso y abuso di alcohol, y nos ta hiba e mensahe aki tur dia cerca nos mucha, nos hoben y nos adultonan, pero nos ta sinti cu ainda e mensahe no ta yegando suficiente eyfo, pa asina e hendenan por tuma esaki na serio”, Toppenberg a señala.
Pa varios siman FADA ta mira cu hopi accidente ta tumando lugar, entre otro, unda cu consumo di alcohol ta envolvi. “Nos polisnan ta man yen durante e ultimo lunanan aki, sigur e prome cinco lunanan di aña tabata tin mas di seis accidente fatal, den nan atrobe uso di alcohol, hopi hende ta keda atras cu dolor y nos ta mira atrobe e importancia di recorda comunidad riba e peligronan di uso di alcohol”, Rubiella Toppenberg a reitera.
Rubiella a menciona cu na momento cu un persona tuma e decision di bebe alcohol, despues di diez minuut esaki ta yega na su cerebro. Na momento cu esaki sosode, di biaha e ta bay haci su efectonan. Un di nan sigur, ta e parti di verdoof. “Na momento cu un persona ta bao influencia di alcohol, su cerebro ta verdoof, y esaki ta bay pone cu pa falta di coordinacion ta afecta su vision, e no por wak straight ni ta wak tur cos cu ta pasa su dilanti. Por ehemplo ora un persona dal den un palo di luz, e ta bisa cu e no ta compronde pakico el a dal den un palo di luz. Esaki ta cosnan cu ta pasa ora un persona ta haci uso di alcohol”, Rubiella a remarca.
Rubiella Toppenberg a señala cu e ultimo dianan e ta mira hopi hoben tras di stuur no solamente bao influencia di alcohol, pero di otro substancianan tambe, loke ta haci e situacion mas peligroso, pasobra no solamente e ta poniendo su bida na peligro pero tambe e bida di otro persona tras di stuur.
“Uso di alcohol ta keda un decision propio. Na momento cu un persona ta scoge pa bebe, e ta keda un decision di dje. Y na momento cu bo ta scoge pa bebe y maneha un vehiculo di motor, esaki ya caba ta wordo considera un crimen. No solamente bo ta pone bo bida na peligro, pero bida di un inocente tambe”, Rubiella Toppenberg a subraya.
