Presupuesto 2022 a wordo aproba, firma, publica y awor ta warda riba opinion oficial di CAFT

Minister Maduro: - *Presupuesto tin un rebaho di 536 miyon florin

ORANJESTAD (AAN): Pa trece claridad den un declaracion pa prensa Minister di Finansa y Cultura mr. Xiomara Maduro a informa cu Presupuesto 2022 di Pais Aruba a keda aproba dia 5 di april pa Parlamento di Aruba.

            Despues di su aprobacion, Gobernador di Aruba a firma e presupuesto dia 13 di april y dia 20 di april Presupuesto 2022 di Pais Aruba a keda publica den Landscourant.

            E mandatario a splica cu den Presupuesto 2022 a tene debido cuenta cu e consehonan di CAFT y Raad van Advies. Presupuesto di aña 2022 compara cu esun di 2020 tin un rebaho di 536 miyon florin pa locual ta e deficit di nos Pais Aruba.

            Den cuadro di supervision financiero, Presupuesto 2022 a wordo manda na CAFT pa asina por haya nan opinion oficial riba esaki.