Presidente di Corte a duna dos aporte durante Congreso Nacional di Enseñanza

A duna workshop hopi interesante tocante criminalidad bao hobennan:

ORANJESTAD (AAN) – Presidente di Corte, mr. Mauritsz De Kort, den un entrevista cu DIARIO, a duna di conoce cu el a wordo pidi pa duna dos aporte; uno como Presidente di Corte como Orado, y otro pa duna un tayer di trabao riba e tema di criminalidad bao nos hobennan, durante e Congreso Nacional di Enseñanza.

“Como Orado mi kier a stimula e maestronan pa pensa kico nos kier pa e futuro di nos enseñanza. Eigenlijk, kico ki bo kier pa nos enseñanza ta bon, bon organiza, cu maestronan capable y motiva p’asina nan por yuda nos muchanan, p’asina e muchanan ey no mester bin dilanti cerca mi na Corte”, mr. De Kort a señala.

Despues di e workshop, el a papia cu e maestronan tocante kico nan por haci activamente, pa yuda e muchanan, si acaso mes nan lo mester cay den man di husticia.

Señor mr.De Kort a expresa cu como Corte e ta kere cu nan ta den un cruzada pa Aruba su futuro. “Nos tin cu pensa aworaki kico nos como organizacion, pero tambe educacion, enseñanza, como un parti importante den nos comunidad, kico ta e cambionan cu nos lo kier pa por mehora. No solamente pa e maestronan, pero tambe pa involucra y interesa nos muchanan, pa nan por compronde cu enseñanza enberdad ta e miho fundeshi cu bo por tin pa nan futuro”, mr. De Kort a expresa.

Presidente di Corte a subraya cu pa yega na e cambionan aki, mester involucra e maestronan mes. “Pasobra mi ta sigur cu nan sa mihor cu nos tur, kico ta e cambionan cu mester ser haci pa por mehora nos situacion”, mr. De Kort a señala.

Tocante e situacion actual, mr. De Kort a comenta cu den informacion cu Corte ta haya di Ministerio Publico, por a mira cu ultimo tempo e cantidad di delito bao hobennan a baha, pero ultimo tempo a bolbe subi, y tin indicacion cu tin di haber cu abuso cu ta loke ta bin mas dilanti.”Ora cu un mucha bin cerca nos na Corte, eigenlijk ta laat caba. Kiermen, kico bo kier pa wordo evita ya e mucha a yega asina leu, anto bo tin cu preveni. Mi ta kere cu un rol asina importante ta cu e maestronan por yuda den esey”, mr. Mauritsz De Kort a bisa.

El a splica cu ora un mucha yega asina leu Reclassering por yuda trece e mucha den miho caminda, pero eigenlijk, asina leu bo no kier yega.

“Mi ta contento di mira bao di hopi maestro awendia, cu nan no ta bisa ‘solamente mi ta duna les y caba’. Mi ta kere, mas y mas nan ta ripara cu maestronan ta, eigenlijk, e tata y mama di nos muchanan. Anto nan ta esnan cu mester inculca balor y normanan di nos comunidad, kico cu nan mira e miho tip cu bo por tin ta papia mescos cu lo bo papia cu bo mesun yiu, p’asina bo por coregi”, mr. Mauritsz De Kort a subraya.