Ministe Ursell Arends:
ORANJESTAD (AAN): Minister di Naturalesa, Sr. Ursell Arends a enfatisa e necesidad critico pa un gobernacion responsabel y conservacion di e patrimonio natural di Aruba. E ultimo decadanan por a nota e impacto negativo di decisionnan populista, acuerdonan corupto y accion politico iresponsabel, cu awe a contribui na degradacion di Aruba su medio ambiente.
Ciudadanonan ta bon na altura cu e economia di Aruba ta depende di turismo, un sector directamente relaciona cu Aruba su paisahenan natural, entre otro su lama, santo blanco y temperatura caribense. Sinembargo, practicanan di desaroyo no sostenibel y falta di regulacion suficiente a hiba nos na un degradacion ambiental significativo, menasando no solamente e beyeza natural di nos isla, pero tambe e fundeshi di nos economia. “Nos a faya pa balansa desaroyo cu e proteccion di nos isla,” Minister Arends a remarca. “E falta di balans aki a resulta den consecuencia dañino pa nos medio ambiente, cu ta poniendo den peliger e industria di turismo cu ta directamente sostene nos economia.”
Involucrando Ministerio di Naturalesa den procesonan cu ta toca infrastructura y cualkier desaroyo di Aruba su tera, tabata un paso vital pa duna naturalesa un bos. Sinembargo, e caminda pa desaroyo responsabel ta rekeri un compromiso continuo y atencion na conseho di e expertonan. Ministerio di Naturalesa, Directie Natuur en Milieu y varios organisacion ambiental, ta keda enfatisa e importancia di tende di expertonan ora ta tuma decisionnan cu lo afecta Aruba su naturalesa.
“Apesar di tur reto cu nos a bin ta enfrenta, entre otro tur e permisonan sin base cu a wordo otorga, nos ta keda comprometi pa restaura e balans,” Minister Arends ta agrega.“Nos ta traha activamente pa asina cada futuro proyecto di desaroyo riba Aruba ta alinea cu metanan di sostenibilidad y consciente di e efecto ambiental. Esaki ta inclui revisa e permiso di por ehempel hotel, beach y otro desaroyonan pa asegura cu nan ta ricibi recomendacion positivo di departamento relevante prome cu nan wordo aproba.”
Lamentablemente esaki no tabata caso den pasado unda awe nos por mira diferente inversionista encontra cu problema legal pa via di no cana e caminda corecto.
Ministerio di Naturalesa ta haci un apelacion na tur stakeholder, incluyendo lidernan politico, inversionistanan y e pueblo, pa pone e preservacion y proteccion di recurso natural di Aruba riba esun cu lo beneficia interesnan personal.
E esfuersonan continuo di Ministerio di Naturalesa ta basa riba un vision caminda desaroyo economico ta den harmonia y balans cu preservacion di nos naturalesa.
