ORANJESTAD (AAN) – Señora Sharine Geerman, Relacionista Publico di The Aruba Blacktie Foundation, a duna informacion tocante e fiesta grandi cu ta existi pa mas di 32 aña den Aruba Junior Chamber International,
y cu despues a pase over pa The Aruba Blacktie Foundation. E fiesta lo tuma lugar Diasabra awo, dia 14 di September.
E evento aki ta bayendo hopi bon, y e aña aki nan ta genera e placa pa Leerorkest Aruba, un biaha mas. Door cu nan no ta hisa prijs, nan policy di The Aruba Tie Foundation ta cu nan por bay dos aña tras di otro, pa e mesun organizacion.
Sharine Geerman a indica cu nan ta genera entre 30 pa 40 mil florin, cu nan por duna Leerorkest. Como cu tur cos ta bira caro y no por cobra pueblo mas caro pasobra ainda nan tin cu cumpra nan bebida, nan paña, etc.
“Y nan ta bay goza, pasa dushi y un florin di nan ta bay pa un bon causa. El a reitera cu e aña aki e entrada ta bay pa Leerorkest pasobra tur hende sa cu e ta traha cu muchanan di scol basico, unda cu nan ta pone un ora accesible, pa nan duna e muchanan les di musica cu por bay defende diferente tipo di musica y siña diferente instrumento”, Geerman a comenta.
Ademas nan ta haya cu musica ta relahante pa e muchanan pa nan por sigui studia miho.
El a splica cu Renaissance ta e lugar mas grandi pa haci un evento asina, pero e no tin suficiente parkinglot ya cu tin un hotel y un mall eybanda, anto e hendenan mester bay trempan pa wak si nan haya un lugar.
E fiesta ta cuminza exactamente anochi 7’or, pero nan ta habri porta entre 6’or pa 6.30 or, anto tin un espacio grandi patras di antes Tivoli Club, den Wilhelminastraat pariba di antes KvK. Eynan tin un stacionamento masha grandi mes y ora el a puntra polis nan a bise cu anochi ta pa publico. Den dia si tin cu paga Aruparking.
The Aruba Black Tie Foundation tin un bus AWG-Tours cu Aruba Black Tie a haya como donacion, pa yuda e fundacion transporta e personanan entre 6 pa 8’or, baha nan na Renaissance y despues di 1 pa 3 or tuma e personanan bek baha na nan auto.
E fundacion a pone dos security available pa yuda controla henter anochi e autonan. Kiermen, mientras e personanan ta goza den e fiesta, nan autonan ta bon cuida. E fiesta ta cuminza di 7’or di anochi pa 3 or di madruga. Di 7 pa 9’or cu un dinner, y di 9or pa 3or ami cu baile. Pa 9’or e bandanan ta cuminza toca. Sharine German ta expresa palabranan di danki pa e pueblo di Aruba pa nan sosten.
