Presentacion di buki y expo riba ‘Aruba Marine life’ na Biblioteca Nacional

ORANJESTAD (AAN):  Recientemente e Artista Luisa Elena Betancourt a presenta su exposicion ‘Aruba Marine life’ na biblioteca nacional na Playa.

            Esaki ta un tremendo exposicion cu ta bay keda habri den Sala di Exposicion te cu dia 31 di maart, henter dia.

            Artista Luisa Elena Betancourt ta un artista Venezolano y ta biba na Aruba ya for di 2016. Luisa ta combina su trabou di artista cu un otro pasion, fotografia bou awa. Sacando potret di bida marino den lama di Aruba, Luisa a yega na un coleccion di potret marino exotico, unico y extenso.

            Ta consisti di un coleccion di potret di pisca, otro bestia, mata y tambe coral.

            Luisa Elena Betancourt a produci un buki di bida Marina dilanti nos costa, muy en particular Mangel Halto y Boca Catalina. Su admiracion pa e bida marino a trece hopi inspiracion y un desaroyo artistico diferente. Varios potret a inspira e artista pa pinta riba canvas y crea obra di arte den forma di collages digital.

            E mes a bisa den entrevista cu DIARIO cu el a pasa 4 of 5 aña den e construccion di e buki aki. El a saca potret, el a haci snorkel y a saca potret di tur loke el a wak bao di lama.

            Esaki ta un regalo pa Aruba y principalmente na e muchanan di Aruba pa nan sa cuida loke e bida marino ta ofrece, a bisa.

            Esaki ta un buki di 280 pagina. El a saca tur potret y tambe el a skirbi tur e textonan. Tambe el a conta di su experiencia durante cu e ta saca e potretnan.

            Betancourt tambe tin pinturanan y obranan digital cu e ta yama 'photo-collage', cual ta e resultado di e inspiracion di su aventuranan bao di lama, a declara.