Preparando pa instala varios palo cu sirena y speaker rond di Aruba

CMO ta percura pa e isla haya un ‘Early Warning System’

ORANJESTAD (AAN): Na varios pais bo ta topa sporadicamente, algun palo (varios di nan ta traha di tubo fuerte) cu tin mas na halto sirena cu ta dirigi den tur cuatro direccion.   Na cierto lugarnan na Merca, e sirenanan aki ta activa si acaso a detecta un hoos (‘tornado’) den cercania, y ta activa e alarmanan aki pa asina tur hende bay busca lugar safe pa salba nan mes.

   Otro paisnan, esaki ta wordo usa pa otro circunstancia, e.o. na Medio Oriente bo ta haya e sirenanan aki ta sona ora cu tin atake cu raket of misil ta wordo detecta, y tur hende tin di core bay sconde den nan ‘bomb-shelter’.

   Aruba lo bay haya un ‘Early Warning System’ tambe, pero esaki lo bay ta dirigi riba multiple tipo di advertencia.  Pesey su nomber ta bira e ora “Multi-Hazard Early Warning System (MHEWS).  Pa Aruba e alarmanan lo sona si acaso detecta desastrenan natural, e.o. inundacion, temblor, horcan, tsunami, secura, y hasta eventonan biologico (e.o. brote di malesa, etc.).

   Na Aruba, Oficina di CMO (Crisis Management Office) ta keda encarga cu e operacion y mantenimento di e Palonan di MHEWS aki.  Ya caba e palonan a yega Aruba.

   Segun CMO, e palonan aki di hero ta un componente crucial di e tecnologia avanza cu lo mehora e preparacion di ciudadanonan na Aruba pa cualkier desastre.

   E presencia di e tubonan aki na lugarnan strategico rond di e isla, ta un paso significante den e intento pa mehora seguridad publico.  E infrastructura aki lo bay ta e base principal di un sistema diseña pa salba bida, reduci daño di propiedad, y mehora capabilidadnan pa reacciona den momentonan di desastre.  Y Aruba lo bay ta e prome pais den region cu lo tin un sistema asina, y cumpli cu e rekesito global di Nacionnan Uni pa tur pais tin uno pa aña entrante 2027.

   E sistema cu ta bin cune na Aruba, no ta djis sona “sirena” pa asina alarma publico.  E sistema di Multi-Hazard Early Warning System aki no ta djis usa sirena, pero via e speakernan por usa voz pa publico, pa asina suminstra pasonan necesario pa tuma decisionnan mas safe.

   Investigacionnan a conclui cu paisnan cu tin Multi-Hazard Early Warning System a nota cu 5x menos hende ta wordo afecta door di desastrenan.

   Riba potret por mira momento cu ta sacando e tubonan for di container, y preparando pa pronto cuminsa instala nan rond di Aruba.