Preparando pa basha asfalt caba na Fase 1 dilanti Highrise Hotelnan

ORANJESTAD (AAN): E trabaonan di renobacion di Irausquin Boulevard, cu ta e caminda dilanti Highrise Hotelnan na Palm Beach,

ta moviendo basta bon. Contratista no a confronta ningun obstaculo inespera durante e trabao di Fase 1.

   Manera ta conoci, Fase 1 ta e area net dilanti RIU Palace Antillas Hotel, y tambe RIU Palace Hotel (ex-Sheraton).

   DOW a indica cu e fundeshi di base a wordo basha riba henter e caminda nobo, y ta bo nivela y drecha, y hasta e banchinan di cement  na banda ta cla.  DIARIO a compronde cu pa Diaranson 5 di Juni 2024, e Contratista lo cuminsa pone e capa mas abao di asfalt.

   Unavez cu e prome capa aki ta poni, tin di lag’e seca completo.  Despues riba Diabierna venidero, 7 di Juni 2024, lo bay pasa e di dos capa, esta e “top layer” di asfalt.

   Unavez esaki keda cla, ya pa Dialuna 10 di Juni 2024, lo bay habri e pida caminda di Fase 1 bek.  Pero mesun momento lo bay cera e pida caminda di Fase 2.

   Manera ta conoci, henter e caminda aki lo wordo renoba, pero e ta bay segun Fase.