Cu deseonan di exito y forza: - ORANJESTAD (AAN) – Minister Presidente mr. Evelyn Wever Croes, Dialuna mainta den Sala di Staten, dirigiendo su mes na Presidente di Parlamento mr. Edgard Vrolijk,
a expresa palabranan di felicitacion como cu el a wordo elegi como Presidente di Parlamento.
“Mi kier a cuminza cu felicita bo persona cu e resultado abrumador den nos area, pasobra con cu bay bin, esnan cu mainta a lanta bunita bisti, bisti bachi bin akiden, pa no skirbi ni un letter riba e papel y vota blanco, cu esey a duna bo un voto di sosten, voto di confianza, y esey ta algo hopi, hopi grandi y p’esey mi kier felicita bo y gradici go tambe pa acepta e posicion grandi cu ta Presidente di Parlamento cu ta e posicion mas halto den nos Constitucion, y cu tin tambe su retonan cune, pero cu nos di fraccion di MEP, en todo caso, tin tur confianza cu, cu e conocimento y experiencia cu bo tin, cu bo lo sa di hacie bon. Bo ta un persona husto y firme, y esey ta locual cu nos mester pa mantene e orden akiden. Esaki, den dos luna, a mustra cu a gana confianza di comunidad, y aworaki mi ta sigur cu e voto di awe ta un confirmacion di esey, y den comunidad bo ta sinti caba cu esnan cu ta siguiendo e reunion, e alegria cu nan tin pa cu esaki.
“ Nos tabata conoce antes un Presidente di Staten cu tabata su so di un parti di Parlamento, y otro parti ora nos tabata den oposicion ta wordo lubida y stroba pa haci su trabao. Y bo ta demostra cu bo ta husto y bo ta permiti tur dos banda haci nan trabao manera mester ta. Eseynan ta puntonan cu tambe ta hopi importante aworaki. Mi ta desea bo hopi, hopi exito, hopi forza, y tambe na e Vicepresidente di Parlamento señor Ursell Arends, pa e periodo cu tin ainda nos dilanti y cu nos bon Dios bendiciona no solamente nos pais, pero pa logra cu den e dirigencia cu boso ta bay mustra akinan, den e Parlamento aki, por sigui gana e confianza di comunidad, manera boso ta haciendo”, mr. Evelyn Wever-Croes a conclui.
