ORANJESTAD (AAN): Segun Premier Evelyn Wever-Croes, oponentenan politico a usa e palabra stigma pa referi na e gobierno di MEP pa loke ta e maneho di stranhero.
E mandatario a bisa cu pa gobierno e meta ta pa traha pa Aruba y Aruba mester di departamentonan manera DIMAS y DPL, entre otro cu ta funciona mas alinea cu otro.
El a señala cu e exito di Aruba su recuperacion ta bay ta den desaroyo economico. Ora cu ta analisa e trabaonan cu ta wordo haci riba tereno di desaroyo economico, un di e 'bottlenecknan' ta e aspecto di permisologia.
Wever-Croes a indica cu tur persona cu haci un peticion tin cu haya un contesta. Sea si of no. Esey ta locual tin cu bay alinea den e procesonan aki, specialmente na e dos departamentonan menciona.
Realidad ta cu aworaki tin un nivel di desempleo halto na Aruba y esey ta influencia e maneho migratorio. "Si mañan nos tin e desaroyo economico cu nos ta buscando y nos tin mester di por ta mas mano di obra, e ora esey lo bay influencia un otro tipo di maneho migratorio", a bisa.
Na e momentonan aki e prome cos cu ta bay pasa ta alinea e manehonan y trata na acelera e proceso pa tur esnan cu ta haci un peticion, den tur transparencia. Ora cu ta tarda, ora cu no tin claridad con un proceso ta cana, den ki fase un peticion ta, ta haya cosnan no transparente ta tuma lugar, e mandatario a remarca.
Wever-Croes a agrega cu esaki ta un reto hopi grandi y den esey lo tey pa yuda e colega minister pa logra e metanan aki.
