Post Aruba N.V. a adkiri un flota nobo di auto electrico pa e parti operacional di e empresa

ORANJESTAD (AAN) — Directora di Post NV, señora Esther Emerencia- Gomes, a yama un conferencia di prensa,

den e parkinglot di Post, unda el a para keto den un momento hopi importante, diamars mainta, cual ta e adkisicion di un flota nobo di auto pa Post Aruba N.V., na unda tur presente por a tuma nota di nan.

            “Esaki ta un momento na unda nos ta para keto riba locual cu ta e compromiso di e empresa estatal aki, pa loke ta sostenibilidad, innovacion y progreso.

Ya pa mas cu seis aña, Post no a sa di ricibi un flota nobo di vehiculo, esaki tambe como consecuencia di diferente situacion agudo, cu a tuma lugar entre otro, tambe pa e impacto di Covid-19, e pandemia den su totalidad, y e situacion financiero di e empresa estatal”, señora Gomes a expresa.

            El a agrega cu awo a tuma e prome paso pa moderniza e flota mas importante di e parti operacional di e empresa aki.

            “Cu cinco di ocho auto electrico, e promenan pa loke ta Post Aruba N.V., nos ta duna nos compromiso firme, cu locual ta sostenibilidad, progreso y innovacion. Y tambe nos ta alinia nos mes cu locual ta e vision di Pais Aruba y Gobierno di Aruba, pa desaroyo sostenible”, Directora di Post Aruba, a subraya.

            El a sigui manifesta cu Post Aruba ta un empresa cu ta conciente di loke ta su responsabilidad social corporativo, pero tambe e ta conciente di e impacto cu e tin riba medio ambiente. “Esaki ta un decision cu nos ta tuma cu sosten y apoyo di nos Hunta di Supervision, y tambe aliña cu e vision di e Minister responsabel pa Post Aruba N.V., y ta e intencion tambe pa poco, poco nos lo sa di innova, digitaliza, y sigui moderniza e operacion y servicionan di Post Aruba N.V.”, Esther Emerencia-Gomes, directora, a señala.

             El a agrega cu Post ta den colaboracion cu e compania “Green Wheels” cu ta e proveedor di e promer cinco di e ocho vehiculonan cu nan a ricibi, y consecuentemente tambe, nan lo sigui cu loke ta e vannan, cu ta den proceso, y e scooternan tambe, cu ta na caminda. “E ta parti di nos vision strategico tambe, pa sigui bay den e rumbo aki, y cu e sosten y atencion debido mi ta sigur cu nos lo sa di logra”, directora di Post Aruba N.V., señora Esther Emerencia-Gomes a subraya.