Si acaso usa scanner
ORANJESTAD (AAN): Diaranson atardi, durante un conferencia di prensa convoca den stacionamento di Registro Civil y Censo, a trece dilanti tur e cambionan cu lo bin pa eleccion 2021 cu lo tuma lugar Diabierna 25 di Juni na Aruba.
E biaha aki pa por cumpli cu e protocol y reglanan sanitario valido pa mitiga e brote di Coronavirus, y tambe pa evita cu mas hende lo haya problema, e Hefe di Censo, Sharin Luydens a mustra riba e plannan pa simplifica y agiliza e trabao e aña aki.
Tur e idea ta pa reduci con hopi hende lo mishi cu documento of papeleo pa reduci contagio. Pa e eleccion aki, Aruba kier evita cu ta comete mesun eror cu a ser haci na Curacao.
Un di e solucionnan ta pa bin cu sistema cu ta yuda den conteo, y tambe yuda den check-in di e votadornan ora cu nan yega cu nan Oproepkaart. Presidente di Urna Electoral lo bay tin menos contacto e biaha aki cu publico.
Y pa e conteo lo haci uso di un Scanner cu ta wordo poni net riba e buzon. Pa e votador benta su stembiljet den dje, e tin di pone e biljet boca abao den e machine, cu ta scan esaki rapidamente y bente despues den e buzon.
Ora cu 7:00 pm bati y cu Presidente di Stemlokaal ta cera esaki, e tin di djis bay na e scanner, primi algun boton y mesora e machine ta imprimi un papel cu ta dunabo mesora cuanto voto tur partido a haya, y tambe cuanto voto cada individual a haya na e Stemlokaal ey.
Pues segun calculo di Luydens, ya pa 8:00 pm pueblo lo haya sa resultado preliminar completo danki na e machinenan aki cu lo yuda agiliza e proceso.
Pero e scanner por acomoda solamente un Stembiljet di 11 partido. Si acaso tin 12 partido pa e eleccion venidero, e ora lo no por usa scanner mas, y lo tin di bay cu e sistema bieu cu kizas lo dura te den oranan di madruga pa keda cla.
